Сени унутмайман...

ва унутаман,
Кечаман кўнглимнинг ихтиёридан.
Менда на ишқ қолди, на-да ҳуш қолди -
Кишансиз қулдирман қул бозорида.
Мен сени излайман... ва изламайман,
На тилак, на армон кўзимда қотди.
Юраги туздайман, қони муздайман -
Кўнглимга сукутинг тирноғи ботди.
Сени чорлаюрман... ва чорламайман,
Бўғзимга тайёрлаб қўяман бир дор.
Сен томон элтажак йўлдан бормайман,
Энди қайдан юрсам сенга не ғам бор.
Сени сўзлаюрман... ва сўзламайман,
Тилимни сақлайман қилич қинида.
Кўнглим бузилса-да аҳдим бузмайман,
Чиқмагай додимнинг саси, уни-да.
Сени ўйлагайман... ва ўйламайман,
Юрагимдан анқир кабобнинг иси.
Дардларим ғарамлаб, ғамлаб қўймайман,
Ўт чақиб, чўғида оламан исиб.
Мен сени эслайман, йўқ, эсламайман!
Охир ўнгиб кетар хотирам туси.
Бедил юрагимдан сазойи бўлиб,
Сени қон қақшатар шу соғинч ҳисси.
СЕНИ...