Залішні мост

Адарваныя ад астатняга свету. Жыхары Залінейнага раёну Буда-Кашалёва, якіх год таму адрэзалі ад асноўнай часткі гораду новазбудаваным чыгуначным мостам і бетоннаю агароджай, не могуць даць рады мясцовым уладам. ЛЮДМІЛА ПАЛЯКОВА, СТАРШЫНЯ ВУЛІЧНАГА КАМІТЭТУ ЗАЛІНЕЙНАГА РАЁНУ: «Падчас Дажынак, якія праходзілі ў Буда-Кашалёве ў 2014 годзе, асноўную частку гораду адкінулі ад Залінейнага раёну. І мы сёння засталіся без крамаў, без аптэк. Нават самае элементарнае – зняць грошы з банкамату – нам трэба пераходзіць на гэты бок. Дарога вельмі цяжкая, пандусы дрэнныя, нельга падняцца«. Мост – пабудавалі, але пра жыхароў, як гэта часта бывае, не падумалі. Узвядзенне ж бетоннай агароджы мясцовыя вертыкальшчыкі тлумачаць захадамі бяспекі, бо чыгунка – месца, дзе перыядычна гінуць людзі. УЛАДЗІМІР ЦІТУЛЕНКА, ГРАМАДСКІ АКТЫВІСТ: «У нас жа кожны чыноўнік намагаецца засцерагчы сябе, менш праблемаў – менш працы. Вось і ўсё. А клопат пра людзей – ён толькі дэкларуецца». Кожны дзень праз мост праходзяць сотні людзей. Сярод тых, хто намагаецца трапіць у цэнтр гораду і вярнуцца дадому, – пенсіянеры, інваліды-вазочнікі, маладыя мамы з вазкамі. Кожны раз, каб падняцца на мост, ім патрэбна нямала сілаў. ЖЫХАРЫ БУДА-КАШАЛЁВА: «Бяда, што і мост далёка, і высокі. Трэба абыходзіць, бо цяпер ведаеце як штрафуюць?». «Няхай зробяць тут праход, і мы будзем перахадзіць. Што, мы ўсе пад цягнікі траплялі?». «У мяне няма сілаў узарваць гэта ўсё. Калі б былі, узяў бы і ўзарваў». Жыхары ўжо звярталіся ў самыя вышэйшыя інстанцыі, але чыноўнікі гэтак і не прапанавалі іншага выйсця буда-кашалёўцам. ІРЫНА ПОМАЗ, ЖЫХАРКА БУДА-КАШАЛЁВА: «Звярталіся некалькі разоў. І ў прэзідэнцкую камісію, і ў кантроль народны. Выніку ніякага, нам сказалі – хадзіце па мосце». Але выйсце, на думку мясцовых, простае – аднавіць ранейшы пешаходны мост, які дзеяў тут шмат дзесяцігоддзяў і нікому не перашкаджаў. Пакуль Беларуская чыгунка не пачала электрыфікаваць гэты ўчастак дарогі. УЛАДЗІМІР ЦІТУЛЕНКА, ГРАМАДСКІ АКТЫВІСТ: «Каб развязаць гэтую праблему, дастаткова прыбраць адну пліту. Ну і там, паміж рэйкамі, пакласці дзве-тры пліты, невялікіх, або заасфальтаваць. Або нават шпалы старыя драўляныя знайсці ды пакласці. Аднавіць тое, што было раней». Зрабіць больш зручны пераход для жыхароў Залінейнага раёну праз чыгунку магчыма яшчэ адным спосабам – пракласці ў гэтым месцы падземныя пераходы. Што праўда, для такога праекту патрэбныя яшчэ большыя грошы. Віталь Бабін, «Белсат»