Անիծվածները - Քրեական / դրամա / Հայաստան / 1991

Ֆիլմի սկզբում երևում է, թե ինչպես է գլխավոր հերոս Տիգրանը (Տիգրան Մխոյան) քայլում Կոնդի փողոցներով։ Մի քանի միլիցիոներներ նրան անսպասելի ձերբակալում են և խցկում միլիցիայի մեքենան։ Միլիցիայի բաժանմունքում նրան հարցաքննում է քննիչ Մարկոսյանը (Արտաշես Ալեքսանյան)։ Նա փորձում է Տիգրանից գողության վերաբերյալ մեղայական կորզել ծեծի և կտտանքների միջոցով։ Տիգրանը խոստովանում է, որ գողացված փողը ստացել է իր սենյակը երկու ժամով վարձով տալու դիմաց, քանի որ իրեն շատ էր փող պետք իր ընկերուհու՝ Սոնայի (Սոֆյա Պողոսյան) ծննդյան տարեդարձին նվեր գնելու համար։ Միաժամանակ, տան խուզարկության ընթացքում պարզ է դառնում, որ Տիգրանը զբաղվում է գեղարվեստով և բանաստեղծություններ է գրում։ Մարկոսյանը շարունակում է իր կտտանքները, ամեն անգամ հարսանեկան ուրախ երաժշտություն (« Ամպել ա , ձուն չի գալիս » երգը ռաբիս վերադաշնակմամբ) միացնելով դրանց ժամանակ։ Երկարատև ֆիզիկական և հոգեբանական ճնշումներից հետո Տիգրանը ստորագրում է մեղայականը, միաժամանակ իր վրա վերցնելով ևս երեք գողությունների մեղքը։ Նախնական կալանքի վայրում նա հանդիպում է կոնդեցի Գուգուշին (Ռուդոլֆ Ղևոնդյան) ով զարմանում է տեսնելով Չախկալին (այդպես էին անվանում Տիգրանին՝ կապույտ աչքերի համար)։ Նախնական կալանավայրում Տիգրանը ծանոթանում է բանտ տեղափոխվելու սպասող մեկ մանկապիղծի, ինչպես նաև կալանավայր նոր բերվող, մի պառավի վրաերթի ենթարկած կամոեցի վարորդի (Հենրիկ Մուրադյան) և կնոջ ու նրա բարձրաստիճան սիրեկանի ջանքերով՝ կնոջը բռնաբարելու մեղադրանքով կալանավորված մի տարեց իրավաբանի (Հովհաննես Ղուկասյան) հետ։ Վարորդին ընտրում են «Քյավառ», իսկ իրավաբանին՝ «Յուրիստ» մականունները։ Նախնական կալանավայրից հետո սկսվում է բանտի տեսարանը, ուր տեղափոխում են Չախկալին, Քյավառին, Յուրիստին և մանկապիղծին։ Բանտում Տիգրանին ծանոթացնում են բանտը տիրություն անող բանտարկյալ Բաշի (Արթուր Դարբինյան) հետ, ում Գուգուշը նախօրոք խնդրել էր լավ նայել Չախկալին։ Բաշը ծանոթանալուց հետո նրան բացատրում է բանտային կյանքի դրվածքը։ Զրույցի վերջում նա Չախկալին առաջարկում է գրքեր, սակայն վերջինս հրաժարվում է, պնդելով, որ սխալմունք է եղել, և նրան շուտով կազատեն։ Բանտում մանկապիղծին ստորացնում են և տեղափոխում են «բոզեր»-ի բարաք (հատված) ։ Այստեղ աստիճանաբար ներկայացվում են բանտարկյալներից մի քանիսը՝ խաղամոլ Չոմբեն (Լևոն Ղազարյան), Թալոշը (Աշոտ Եդիգարյան), համր Լալոշը (Դավիթ Դովլաթյան), Պախանը (Հովհաննես Փախանյան) ևն։ Երբ բանտարկյալները լինում են քարհանքում Չոմբեն Լալոշին խաբում է ասելով, թե՝ եթե վերջինս ուզում է մեկ օրով տեսնել իր հորը, պետք է Չոմբեին տա իր վզի խաչը, որով, ինքը՝ Չոմբեն, իբրև թե պետք է կաշառի պահապաններին։ Չոմբեն խաբում է Լալոշին, թե պայմանավորվել է պահապանների հետ և Լալոշն ուրախ վազում է քարհանքի սահմաններից դուրս, ինչը դիտարկվում է որպես փախուստի փորձ և պահապանները կրակ են բացում նրա ուղղությամբ՝ սպանելով Լալոշին։ Սակայն Չոմբեի ճարած խաչը պարտատերը չի ընդունում։ Գլխավոր դերերում: Տիգրան Մխոյան - Տիգրան Արթուր Դարբինյան - Բաշ Սոֆյա Պողոսյան - Սոնա Հովհաննես Ղուկասյան - Յուրիստ Ռուդոլֆ Ղևոնդյան - Գուգուշ Լևոն Ղազարյան - Չոմբե Հենրիկ Մուրադյան - Քյավառ Աշոտ Եդիգարյան - Թալոշ Հովհաննես Փախանյան - Պախան Արտաշես Ալեքսանյան - քննիչ Մարկոսյան Սերգեյ Մկրտչյան - Քիթ Դավիթ Դովլաթյան - Լալոշ