Дарё бўлдим, мисраларим сароб бўлди,

Саҳро бўлдим, вужудимда ёнди оташ.
Баҳор эдим-ёмғирлардан ичим тўлди,
Изҳор бўлдим-дунё бўлди чин бағритош..
Бечораҳол тақдиримни сўзга тутдим,
Озор деди, озорлардан чарчадим,дод!
Бардошимни йиғлаёлмай ичга ютдим
Осмон бўлдим-кўринмади ҳеч одамзод...
Хаёл бўлдим-ойдин тонглар таҳқирланди,
Савол бўлдим-юрагимни сипқорди дард.
Рўё бўлсам, хароболар тақдирланди,
Умрим бўлди оқ кунларга йўлолмас гард!
Дарё бўлдим-мисраларим сароб бўлди.