Սիրելի՛ բարեկամ՝ լոռեցի հայր, մայր, քույր, եղբայր, զավակ:

Ահա և մոտեցանք քարոզարշավի եզրափակիչ հանգրվանին:
Այժմ վճռական խոսքը քոնն է:
Քո որոշումից շատ բան է կախված, ավելին քան դու պատկերացնում ես: Երկրի բացարձակ կառվարման ղեկը հանձնել անփորձ, առանց աշխատանքային կենսագրության բախտախնդիրների, թե՞ նրանց, ովքեր տարիներ շարունակ, չեմ խուսափի այս բառից` զօրուգիշեր աչք չեն փակել, որ քո հոգսը թեթևան, քո զավակների ապագան առավել խոստումնալից լինի: Իմ աշխատանքային կենսագրությունը քո աչքի առջև է, արված գործերը՝ ևս: Այս ընթացքում ներկայացված յուրաքանչյուր ասելիքի ամեն մի տողում և տողատակում տքնանք ու փորձառություն կա, հսկայական ջանքեր:
Հիշի՛ր, միանձնյա կառավարման համակարգը, մեկ անձի հեղինակության վրա հիմնված իշխանությունը, երբե՛ք լավ բանի չի տանում. այդ մասին է վկայում համաշխարհային պատմությունը, այդ մասին է վկայում աշխարհի շատ երկրների դառը փորձառությունը…
Ինձ համար բացարձակ արժեքներ են եղել ու միշտ կլինեն հայրենիքը, եկեղեցին, ընտանիքը, դպրոցը, և ցավալի է ու չափազանց մտահոգիչ, որ ոմանք ոտնձգություններ են թույլ տալիս այդ սրբությունների հանդեպ: Թույլ չե՛նք տա:
Սիրելի՛ լոռեցի
Իմ մոտեցումը, որի մասին ևս խոսել եմ տարիներ շարունակ և կիրառել եմ գործնականում՝ մասնակցային կառավարումն է եղել: Սովորել եմ բոլորիցդ, և ձեզնից յուրաքանչյուրի փորձը, խորհուրդը ինձ համար շատ կարևոր ու առաջնային են եղել:
Եվ վերջում. սիրելի՛ բարեկամ, ուզում եմ վստահեցնել, որ անկախ ընտրությունների արդյունքից, ես իմ ողջ ներուժով միշտ քո կողքին եմ լինելու:
Մենք դեռ միասին անցնելու ճանապարհ ունենք…
Արթուր Նալբանդյան