Цікавае падарожжа Надзейкі. Полацкая спадчына. Вёска Нача

У вёсцы Нача Надзейку чакаў незвычайны гістарычны экскурс. Былы настаўнік мясцовай школы Крамзюк Аляксандр Пятровіч шмат гадоў таму пачаў весці летапіс свайго краю. У вялікай кнізе ён маляўніча апісаў гістарычныя звесткі, фіксаваў усе значныя падзеі з жыцця вёскі Нача і сваіх аднасяльчан, збіраў фальклор. Нажаль гэты зацікаўленны чалавек ужо пайшоў з жыцця, але яго намаганні не былі страчаны, захавальніцай яго каштоўных нататкаў стала Пестун Вера Анатольеўна. З ёй і сустрэлася Надзейка, каб падрабязней распытаць пра гісторыю Нацкага краю і жыццё Крамзюка А.П. Мясцовыя культработнікі і зараз выкарыстоўваюць звесткі з гэтай каштоўнай кнігі ў сваёй рабоце, спатрэбілася яна і пры падрыхтоўцы этнакутка, які днямі адкрыўся ў філіяле 12 Нацкім сельскім клубе ў рамках раённага агляду-конкурсу этнаграфічных куткоў "Свет нашых продкаў". Самы актыўны ўдзел у яго арганізацыі прынялі Пестун Вера Анатольеўна, Котава Алена Карлаўна, Цярэшчанка Зоя Уладзіміраўна. Гаспадыні разам з загадчыкам Нацкім СК Пестунам Уладзімірам Данілавічам падрыхтавалі цікавую прэзентацыю кожнага экспаната і падаравалі гасцям творчы нумар пад гармонік. На гэтым вандроўкі гарадской дзяўчыны па вёсках Полаччыны не заканчваюцца, у планах яшчэ шмат цікавых і пазнавальных сустрэч з таленавітымі вяскоўцамі.