Дилмурод Махсадов

ИФТИХОР...

Шукр гӯям зиндагиро, чун забонам тоҷикист,
Риштаи пайванди ҳусну ҷисму ҷонам тоҷикист.
Бо забони ман, магар Аллоҳ мегӯяд сухан,
Дар биҳишти ҷовидонаш, чун баёнам тоҷикист.
То ба мағзи устухонам бӯи ширу аллаҳост,
Ҳар нишони модарам, андар равонам тоҷикист.
Зиндагӣ талх аст, аммо бо забони модарӣ,
Лаҳзаҳои шаккарини ҷовидонам тоҷикист.
Бо ҳамин лафзи дарӣ бо ёри худ гӯям сухан,
Ҳам намозу ҳам ниёзи ҳар замонам тоҷикист.
Бе забони модарӣ, чун пайкарам, аз обу гил,
Ҷавҳари ҳастии ман, тобу тавонам тоҷикист.
Эй, Саодат, лафзи худро то қиёмат пос дор,
К- аз адам, то бар абад- ҳар ду ҷаҳонам тоҷикист...
Саодат Сангинова.