Nə olub yoxdu, gözüm, bircə gilə yaş səndə?
Sənə nolub, ürəyim, bağlamısan daş sən də?
Gəldi yaz, güldü günəş, dağ da əritdi qarını,
Çeşmələr tək cərəyan eylə aşib-daş sən də.
Gəh çökür qəm sənə gəh, şadlıq edirsən, könlüm,
Bu nə əhvali-müxalif, nə verir baş səndə?
Gəl, əziz canı satım mən sənə, bir can məndə,
Əvəzində can alan, kiprik ilə qaş səndə.
Eşqdən bixəbər, eşqin yolunu bilməkçün,
Gəl mənim tək hələ dağlar, dərələr aş sən də.
Qınama gəl məni Şahım bu qədər vəsf edirəm,
Mən kimi aşiq oleydin Əliyə kaş sən də.
Dövləti-şe'r ilə sanma özünü fəqr əhli,
Gər, Fənai, bu qədər var isə daş-qaş səndə.