სამძიმარს გითვლით...
დღეს გლოვა არის საქართველოში,
ემიგრანტების გულიც ატირდა,
შავი ჩაიცვა დედა თბილისმა,
გარინდებულა ჩემი მთაწმინდა.
ღმერთო, მაღალო! შენ დაგვიფარე,
დიდი გამოცდის წინაშე ვდგავართ,
შენი რწმენის და ლოცვის გარეშე,
მიწაზე გართხმულ უსულოს ვგავართ.
შენი ცრემლები მიწას ასველებს
დღეს ძნელბედობის ჟამი გვდგომია,
ქართველი ერი ეშმაკთ ცდუნებამ
დასცეს ოდესმე არა მგონია.
ვაი სიშორევ, ძალა არ გვყოფნის
ტკივილმა ქვა-კლდედ გადაგვაქცია,
სამძიმარს გითვლით ქართველო ერო,
საზღვრებს გარედან ემიგრაცია.