БУЛЬБА АБ'ЯДНОЎВАЕ

Асноўная падзея мінулага тыдня – БУЛЬБЯНЫ ФЭСТ У ГЕРМАНАВІЧАХ, які сабраў вяскоўцаў і гасцей, каб уславіць беларускую бульбу. Тут кожны мог знайсці сябе занятак па душы. Ужо адразу на “Бульбяной мытні” наведвальнікі зараджаліся станоўчымі эмоцыямі. З задавальненнем дарослыя і дзеці ўдзельнічалі ў квэсце “Спадчына і смак: ад маляванкі да бульбяной запяканкі”. Паўсюль панавала весялосць, якую стваралі вядучыя свята і самадзейныя артысты.
Цікавасць выклікаў кулінарны конкурс “З бульбы ўсяго шмат”. Шляхам народнага галасавання былі вызначаны лепшыя з лепшых, якія атрымалі прызы ад пастаяннага партнёра музея – Мінскага маргарынавага завода.
Дранікі на калодзе, яечня са шкваркамі, прыгатаваная на піле-двухручцы, бульба з салам, запечаная ў фользе, поліўка – стравы, якімі ахвотна частаваліся госці і на ўсе лады ўхвалялі гаспадынь і дзякавалі ім.
Самы галоўны вынік бульбянога фэсту – гэта добры настрой людзей, якіх аб'яднала свята