Пасля сканчэння студыі пры БДТ-2 (1928) да канца дзён працаваў у Коласаўскім тэатры. Гэта быў вострахарактарны артыст, ярка камедыйнага і сатырычнага плана. Створаныя ім вобразы былі адметныя напоўненасцю, інтэнсіўнасцю сцэнічнага існавання. Жыццёвае праўдападабенства , дакладнасць псіхалагічнага малюнка ролі спалучаў з дасканалай пластычнасцю, выразнасцю і адточанасцю мастацкіх дэталяў. Выконваў пераважна эпізадычныя ролі, якія даводзіў да высокай завершанасці: Чыр ("Любоў Яравая" К.Транёва), Майстар гадзіннікаў ("Крамлёўскія куранты" М.Пагодзіна), Хлопаў ("Рэвізор" М.Гогаля), Штальмайстар ("Клоп" У.Маякоўскага).
Асаблівым поспехам карыстаўся ў беларускім рэпертуары.Багаццем акцёрскіх фарбаў, каларытнасцю вызначаліся: Куторга ("Пінская шляхта" В.Дуніна-Марцінкевіча), Сымон Рапецька ("Бацькаўшчына" К.Чорнага), Ёсып ("Навальніца будзе" паводле Я.Коласа), поп Ілля ("Званы Віцебска" У.Караткевіча). Асабліва вылучалася роля Суддзі ў "Несцерцы" В.Вольскага, якую Матусевіч іграў больш за 40 гадоў і давёў да найвышэйшай дасканаласці, да маленькага сцэнічнага шэдэўра.
Этапнымі ў творчасці Іосіфа Антонавіча сталі ролі ў п'есах Макаёнка: Гарошка ("Выбачайце, калі ласка!"), Цярэшка Калабок ("Трыбунал"), дзед Цыбулька ("Таблетку пад язык"), якія выконваў з тонкім народным гумарам, дасціпнасцю. З сатырычнай вастрынёй і графічнай дакладнасцю быў увасоблены вобраз Графа ў "Шахматах" С.Граховяка.
Артыст актыўна здымаўся ў кіно. Сярод кінароляў: Аўсей ("Дзед Аўсей і Палашка"), Янук (галоўная роля - "Тартак"), Дзед ("Фруза"), Расстраляны дзед ("Мы -хлопцы жывучыя") і іншыя.
Присоединяйтесь к ОК, чтобы подписаться на группу и комментировать публикации.
Нет комментариев