Коласаўскі тэатр

Віншуем з днём нараджэння артыста драмы Блыкіна Іллю Станіслававіча! Ілля Станіслававіч пачаў працаваць у тэатры імя Якуба Коласа з 2021 года, яшчэ падчас навучання ў Віцебскім дзяржаўным каледжы культуры і мастацтваў. Пасля паспяховага заканчэння каледжа па спецыяльнасці «акцёр драматычнага тэатра і кіно» працягвае працу ў тэатры ў якасці артыста драмы. Пачынаў з эпізадычных вобразаў: Танцор («Асенні rock'n'roll» па матывах п’есы М.Хейфеца «Rock'n'roll на захадзе сонца»), Служка («Смешныя людзі» па аднаактовых п’есах А.Чэхава («Юбілей»). Паступова перайшоў да больш значных роляў: Заяц («Шэрая Шыйка» В.Ткачова па матывах творчасці Д.Маміна-Сібірака), Гаўрушка («Вытанчаны падман» па п’есе М.Гогаля «Гульцы»), следчы Слэйтан («Фанцікі» па п’есе Р.Куні «Смешныя грошы»), Крынкін («Выбар» А.Дударава), П’еро («Залаты ключык» А.Талстога), Фарцінбрас («Гамлет» У.Шэкспіра), Фашысцкі афіцэр («Сотнікаў» В.Быкава паводле аднайменнай аповесці), Мікеле («Шлюб па-італьянску» па п’есе Э.дэ Філіпа «Філумена Мартурана»). Сярод вобразаў, створаных у апошнія сезоны, асабліва вылучаюцца: Уільям Гарысан («Мая жонка - падманшчыца» М.Мэё, М.Энэкен), Альбін («Усе мышы любяць сыр» Д.Урбана), Сідар Шавура («Ілля Рэпін. Здраўнёўскія замалёўкі» А.Замкоўскага), Жан («Кот у ботах» А.Замкоўскага паводле творчасці Ш.Пэро), Адважнік («Беласнежка і сем гномаў» паводле казкі братоў Грым «Беласнежка»), Рэмбо («Дамы і гусары» А.Фрэдры) Вадзім ("Кара-ціці-кара" ("Удовін параход") І.Грэкавай, П.Лунгіна, Мядзведзь («Лясное сяброўства» А.Замкоўскага), Прынц («Папялушка» Т.Габэ паводле творчасці Ш.Пэро), Рыжы («Зімы не будзе?» В.Альшанскага). Жадаем Іллі Станіслававічу добрай творчай перспектывы, новых цікавых роляў, асабістага шчасця, выдатнага настрою!

Віншуем з днём нараджэння вядучага рэдактара тэатра Замкоўскага Аляксандра Міхайлавіча! Аляксандр Міхайлавіч (Алесь) працуе ў тэатры імя Якуба Коласа з 26 лютага 2013 года. За гэты час заслужыў вялікі аўтарытэт у калектыве дзякуючы высокаму прафесіяналізму, глыбокім ведам, выдатным арганізацыйным здольнасцям, прынцыповасці, паважлівым адносінам да сваіх калег. З’яўляецца аўтарам сцэнарыяў многіх бенефісаў, шэрагу творчых вечароў. Займаўся мастацкім перакладам п’ес, якія былі ўключаны ў рэпертуар: “Я вольны!” А.Натомб, “Гаральд і Мод” К.Хігінса, “Дзіўная місіс Сэвідж” Дж.Патрыка, “Матылёк… Матылёк…” А.Нікалаі, “Глыток чужога віскі” Л.Агулянскага, “Юбілей, "Прапанова", "Пра шкоду тытуню" А.Чэхава (па якіх створаны спектакль "Смешныя людзі"), “Агнявы Леў” А.Кружнова, апавяданняў В.Шукшына да спектакля “Яшчэ раз пра каханне” В.Шукшына, "Звярыныя апавяданні" Дона Нігра, "Стары-стары сеньёр з вялізнымі крыламі" паводле Г-Г.Маркеса, "Пёс Белага Вострава" А.Дударава, "Гульцы" М.Гогаля для спектакля "Вытанчаны падман", «Залаты ключык» А.Талстога, «Удовін параход» І.Грэкавай, П.Лунгіна да спектакля «Кара-ціці-кара» («Удовін параход»), інсцэніроўкі аповесці «Парашутыст» А.Селіна, "Мяшчанскае вяселле" Б.Брэхта, "Тытанавая ведзьма" У.Альхоўскай, "Зімы не будзе?" В.Альшанскага. Займаўся адаптацыяй перакладаў п’ес “Рамэа і Джульета” У.Шэкспіра, "Апошнія" М.Горкага, "Дурнічка" Лопэ дэ Вегі да сучаснай беларускай мовы. Напісаў вершы для песень многіх спектакляў, якія ўзбагацілі мастацкую частку пастановак. З’яўляецца аўтарам п’ес “Кот у ботах” паводле Ш.Пэро, "Чароўны хлопчык", "Дванаццаць месяцаў" (паводле творчасці С.Маршака), "Ілья Рэпін.Здраўнёўскія замалёўкі", "Лясное сяброўства", па якіх былі пастаўлены аднайменныя спектаклі. З'яўляецца адным з арганізатараў гарадскога конкурсу "Сцэнічныя чытанні "Школьны тэатр". Жадаем Аляксандру Міхайлавічу моцнага здароўя, шчасця ў асабістым жыцці, няўрымслівасці, вытрымкі, творчых поспехаў, натхнення!

Віншуем з днём нараджэння мастака-афарміцеля тэатра ПАХОМАВУ АЛІСІЮ ВАЛЕР'ЕЎНУ! Алісія Валер'еўна працуе ў коласаўскім тэатры з 1 жніўня 2022 года. За гэты час зарэкамендавала сябе працавітым, добрасумленным, ініцыятыўным работнікам. Жадаем Алісіі Валер'еўне добрага здароўя, выдатнага настрою, рэалізацыі ўсяго задуманага!

Нацыянальны акадэмічны драматычны тэатр імя Якуба Коласа віншуем з днём нараджэння артыстку драмы, вядучага майстра сцэны Ульяну Аляксандраўну Ацясаву! Ульяна Аляксандраўна працуе ў тэатры імя Якуба Коласа з верасня 1999 года. Выдатныя знешнія дадзеныя, цудоўныя вакальныя і харэаграфічныя здольнасці, працавітасць, адказнасць, творчая ініцыятыва дазволілі актрысе стварыць шэраг выдатных разнапланавых вобразаў на коласаўскай сцэне. У сённяшнім рэпертуары артысткі наступныя ролі: Наста («Несцерка» В.Вольскага), Бацян («Не пакідай мяне...» А.Дударава), Слаўка («Доктар філасофіі» Б.Нушыча), Шарлота («Скрыпкі часам вядуць да вар’яцтва» па п’есе Ф.Саган «Скрыпкі часам»), Луіза («Восем закаханых жанчын» па п’есе Р.Тама «Восем жанчын»), Эмка і Раіса Ласкіна («Пазычанае шчасце» Ф.Палачаніна), Жанэтт («Пёс Белага вострава» А.Дударава), «Адэлаіда Іванаўна» («Вытанчаны падман» па п'есе М.Гогаля «Гульцы»), Марыя і Дзяўчына («Дзеці. Вёрсты» А.Казюханава паводле творчасці Якуба Коласа), Старэйшая фрэйліна («Дванаццаць месяцаў» А.Замкоўскага паводле творчасці С.Маршака), Фелісата Міхайлаўна і Наталля Дзмітрыеўна («Дзядзечкаў сон» паводле аднайменнай аповесці Ф.Дастаеўскага), Джэйн Перкінс («Фанцікі» па п’есе Р.Куні «Смешныя грошы»), Танцорка («Гісторыя кахання» паводле аднайменнай аповесці Э.Сігала), Маці хлопчыка («Выбар» А.Дударава), Геральд і Жабка («Залаты ключык» А.Талстога), Ізольда, Вялікая Чараўніца-Кошка («Усе мышы любяць сыр» Д.Урбана), Таццяна Аляксееўна («Смешныя людзі» па аднаактовых п’есах А.Чэхава («Юбілей»), Фрузя («Дамы і гусары» А.Фрэдры), пані Анэля («Дамы і гусары» А.Фрэдры), Вера Аляксееўна Шаўцова («Ілля Рэпін. Здраўнёўскія замалёўкі» А.Замкоўскага), Нявеста («Вяселле-буф» па п'есе Б.Брэхта «Мяшчанскае вяселле»), каралева Гертруда («Гамлет» У.Шэкспіра). Занятая ў музычна-паэтычным вечары «Как я люблю глубину твоих ласковых глаз...», у музычным вечары «Душэўная размова», у спектаклі «Ваўкалак» паводле аднайменнага апавядання Я.Баршчэўскага. Рэжысёр-пастаноўшчык спектакля «Беласнежка і сем гномаў» паводле казкі братоў Грым «Беласнежка». Аўтар харэаграфіі і пластыкі спектакляў «Дзядзечкаў сон» паводле аднайменнай аповесці Ф.Дастаеўскага, «Парашутыст» паводле аднайменнай аповесці А.Селіна, «Дамы і гусары» А.Фрэдры, «Вяселле-буф» па п'есе Б.Брэхта «Мяшчанскае вяселле», «Нечаканая радня» па п'есе Б.Нушыча «Засмучаная радня». Уваходзіць у склад мастацкага савета тэатра. Тэатр зычыць Ульяне Аляксандраўне моцнага здароўя, пастаянных творчых набыткаў, сонечнага натхнення, новых яскравых роляў, шчаслівага сямейнага жыцця!

31 ліпеня 2026 года ў 17.00 у Дзяржаўным літаратурна-мемарыяльным музеі Якуба Коласа адбудзецца мерапрыемства «Колас і коласаўцы» з удзелам супрацоўнікаў Нацыянальнага акадэмічнага драматычнага тэатра імя Якуба Коласа з Віцебска. Мерапрыемства прымеркавана да 100-гадовага юбілею Коласаўскага тэатра і распавядзе пра багатую гісторыю супрацоўніцтва паэта і тэатра. Якуб Колас не толькі стаў адным з класікаў беларускай літаратуры, але і адыграў ключавую ролю ў станаўленні Віцебскага тэатра. Менавіта з яго п’есамі звязаны значны этап у гісторыі гэтай сцэны, якая ў 1944 годзе атрымала імя народнага песняра. . Наведвальнікі музея змогуць даведацца пра гісторыю ўзаемадзеяння Коласа з калектывам Другога Беларускага дзяржаўнага тэатра (БДТ-2), які быў створаны ў 1926 годзе ў Віцебску, а таксама пра ўвасабленне твораў Якуба Коласа на сцэне тэатра імя Якуба Коласа ў сучаснасці. Госці мерапрыемства пачуюць расказ пра тое, як менавіта «коласаўцы» – акцёры тэатра, якія выраслі на вобразах яго герояў, сталі сапраўднымі захавальнікамі яго творчасці. Успаміны пра сумесную працу і вялікую дружбу, якая ўсталявалася паміж паэтам і артыстамі, перанясуць нас у атмасферу тэатральнага жыцця 1920-1930-х гадоў, калі фарміраваліся традыцыі беларускага тэатральнага мастацтва . У праграме вечара – выступленні акцёраў, дэманстрацыя архіўных фотаздымкаў і відэазапісаў. Сардэчна запрашаем усіх аматараў тэатральнага мастацтва і класічнай літаратуры! Уваход па ўваходнаму білету ў музей – 7 рублёў. Сардэчна запрашаем!

Віншуем з днём нараджэння артыста драмы Волата Рамана Дзмітрыевіча! Раман Дзмітрыевіч працуе ў тэатры імя Якуба Коласа з 15 лістапада 2021 года.Сярод сыграных роляў: Служка ("Смешныя людзі" па аднаактовых п'есах А.Чэхава), Аляксей ("Вытанчаны падман" па п'есе М.Гогаля "Гульцы"), Круглы, Чэсь ("Дзеці.Вёрсты" А.Казюханава паводле творчасці Я.Коласа), Афанасій Мацвеевіч ("Дзядзечкаў сон" паводле Ф.Дастаеўскага), Іван ("Саня, Ваня, з імі Рымас" У.Гуркіна), Ратавальнік («Агнявы Леў» А.Кружнова), Агнявы Леў («Агнявы Леў» А.Кружнова), Качар («Шэрая Шыйка» В.Ткачова паводле аднайменнага апавядання Д.Маміна-Сібірака), Тама Дыяфуарус («Нібыта хворы» Ж.-Б.Мальера), Флеран («Нібыта хворы» Ж.-Б.Мальера), Другі доктар («Нібыта хворы» Ж.-Б.Мальера), Карабас Барабас («Залаты ключык» А.Талстога), Франсіска («Гамлет» У.Шэкспіра), Бернарда («Гамлет» У.Шэкспіра), Дэвенпорт («Фанцікі» па п’есе Р.Куні «Смешныя грошы»), Жыркевіч («Ілля Рэпін. Здраўнёўскія замалёўкі» А.Замкоўскага), Шома («Усе мышы любяць сыр» Д.Урбана), Філіп («Кот у ботах» А.Замкоўскага паводле творчасці Ш.Пэро), Гарбуноў («Парашутыст» паводле аднайменнай аповесці А.Селіна), Весялун («Беласнежка і сем гномаў» паводле казкі братоў Грым «Беласнежка»), Капелан («Дамы і гусары» А.Фрэдры), дзядзька Зюся («Шагал… Шагал…» паводле п’есы У.Драздова «Прамы вагон да Парыжа з усімі перасадкамі»), Міліцыянер ("Зімы не будзе?" В.Альшанскага), Музыка ("Вяселле-буф" па п'есе Б.Брэхта «Мяшчанскае вяселле»), Дзік ("Лясное сяброўства" А.Замкоўскага), Дубльмэн ("Шалёны дзень, ці Жаніцьба Фігаро" П.Бамаршэ) Жадаем Раману Дзмітрыевічу добрай творчай перспектывы,, новых цікавых роляў, натхнення, выканання ўсіх жаданняў!

Навіна пра спектакль "Ілля Рэпін. Здраўнёўскія замалёўкі" на тэлеканале "Мир"

Водгукі на пленэрныя паказы спектакля «Ілля Рэпін. Здраўнёўскія замалёўкі». «Сёння калегі філіяла «Мазалаўскі сельскі Дом культуры» выдатна правялі вечар, акунуліся ў атмасферу мастацтва і гісторыі. На тэрыторыі музея-сядзібы І.Я.Рэпіна «Здраўнёва» мы паглядзелі спектакль «Ілля Рэпін. Здраўнеўскія замалеўкі», які падарыў яркія эмоцыі, дазволіў па-новаму зірнуць на творчасць выдатнага мастака і адчуць адменную атмасферу гэтага дзіўнага месца. Вечар атрымаўся па-сапраўднаму цёплым, душэўным і запамінальным. Такія сустрэчы натхняюць, яднаюць і яшчэ раз напамінаюць, як важна знаходзіць час для культуры, мастацтва і камунікавання!» «17 ліпеня калектыў нашага прадпрыемства правёў дзіўны вечар у Здраўнёве. У атмасферы прыроднай прыгажосці мы дакрануліся да творчасці Іллі Рэпіна. «Ілля Рэпін. Здраўнеўскія замалёўкі» - гэта выдатная і цікавая ідэя для знаёмства з выдатным мастаком і яго творчасцю. Адменны каларыт «Замалёўкам» надаюць сцэны з мясцовымі жыхарамі. Мы ўдзячныя артыстам і ўсім, хто рэалізаваў гэту ідэю для нас, за магчымасць дакрануцца і адчуць, складанасць выбару і перыпетыі лёсаў сям'і выдатнага мастака. Чакаем новых цікавых праектаў! Калектыў ЗАТ «Медыцынскае прадпрыемства Сімург».