Игорь ГУБАЕВ

Тышан кодам...
Чыла, чыла корно денат
Кеҥеж ала-кушко вашка…
Кӧлан гын тый шыдешкенат?
Ой, шыже йӱржым вет шава!
Куэ гыч солыкшым руден,
Лышташ-влак чытырен йогат.
Шыдетым ӧрдыжтӧ коден,
Кеҥеж, кунам уэш толат?
Южшат воктене йӱр пушан…
Рӱмбалге, кечыгут пылан.
Чеверласен кодмек тышан,
Чон марте ночко кумыллан.
Кавасе корныштым ончен,
Иркомбо-влакым ужатем.
Йокрок. Но мый тендам вучем.
Тыштак илен, эрта жапем.