Чолман

Памашым тӧрлат

Республикыште «Экологий да пӱртӱс поянлык» программа почеш тӱрлӧ районлаште 10 памашым тӱзатат. Калтаса районысо Торасолаште, Бирск районысо Кужнурышто, Мишкан районысо Кемийыште да Краснокам районысо Чормакыштат памашыштым тӧрлынешт, палдара республикын Пӱртӱс дене пайдаланыме да экологий министерствыже.
Э. АПТУЛМАНОВА.

Книга пайрем

Уфаште «Китап-Байрам» IV тӱнямбал книга ярмиҥгам тений 28-30 майыште эртарат.
Тиде гана тудо пӱтынь республикынам авалта - ола ден районлаште 360 мероприятий лийшаш.
Ярмиҥгаш Москва, Санкт-Петербург, элысе моло олала, Белоруссий, Иран да моло элла гыч 80 савыктыш толшаш. Тушко мийыше-влак сылнымутан, йоча, исторический да патриотический литературым налын, у книга-влак нерген каласкалымым колышт кертыт.
Книга пайремлан моткоч поян программым ямдылыме: ятыр вашлиймаш, выставка, мастер-класс, концерт, интерактивный занятий-влак да молат лийыт, кастене йӧратыме фильм-влакым ончыктат.
Э. АПТУЛМАНОВА.

Кок ломбо

Уремысе капка воктене
Шога кок ломбо, ваш ончен,
Коча-кова шынден коденыт,
Ме нуным илена шарнен.
Вашлийыт пуйто,
кид кучалын,
Да толшо еҥым саламлат.
Парчаштым лывыртен
рӱзалын,
Капка гыч лекшым ужатат.
А шошым ош пеледыш дене
Ял уремнам сылнештарат.
Свежа да тамле
пуш ден темын
Шӱла вестӱрлын
пӧрт кӧргат.
Кеҥеж мучашлан
емыж ямде.
Поген налат -
сай витамин.
Тӱзланыза тыгак ямлаҥын,
Мемнан чоннам куандарен!
Роза АЛПАЕВА.
Пӧкленде ял, Мишкан район.
Авторын фотожо.