Кок кундем коклаште

Башкортостан ден Беларусь республика-влак коклаште школ туризм дене кылдалтше программым - «Сила единства» профильный сменым - илышыш шыҥдарат. Башкортостан Вуйлык Радий Хабировын мутшо почеш, август тылзыште Башкирийысе «Патриот» военно-патриотический паркыште Беларусь гыч Минск автозаводышто пашам ыштыше ава-ача-влакын икшывышт, 20 тунемше, канаш толын. Нуно кундемын историйже, йӱлаже, тӱвыраже дене палыме лийыт, патриотизм шӱлышан мероприятийлаште шуаралтыт. Тыгак кодшо арнян Беларусьыш Башкортостан гыч 20 йоча миен. Нунын коклаште олимпиада, конкурс, конференцийлан призер ден сеҥышыже, самырык-влакын мер толкыныштын чолга ӱдыр-рвезыже-влак улыт. МАЗ-ын йоча лагерьыштыже каналтыше тунемше-влакланат оҥай программым - автозаводыш, «Хатынь», «Курган Славы», «Линия Сталина» мемориал комплексыш, Кугу Ачамланде сарын историйжын музейышкыже экскурсийым да молым - ямдыленыт.
Л. ШАВАЛИЕВА