Предыдущая публикация
Ришта…
Янги кун! Мақсадлар сари янги қадам! Бугун сизни талайгина ишлар кутмоқда. Иш юзасидан ким биландир учрашасиз. Кобинетингизда кун бўйи қоғоз титкилайсиз. Сизга топширилган янги бино қурилишига бош-қош бўласиз. Аудиторияда сизга диққат билан қараб ўтирган талабаларингизга маъруза ўқийсиз. Янги лойиҳангизни жамоангиз билан муҳокама қиласиз. Кун давомида рақамлар билан ҳисоб-китобда бўласиз. Машинангизда турли инсонларни ўз манзилига элтиб қўясиз. Иш вақтингиз учун ажратилган соатлар мобайнида турли одамлар билан алоқада бўласиз.
Уйғондингиз-у, бугунги кун режалари ҳаёлингизда чарх урди. Тўзғиган режалар билан нонушта қилдингиз. Кийим жавонингиздаги покиза кийимларингизни кийиб, партфелингизни қўлга олдингиз ва ўз ишингизга отландингиз. Сизни кутаётган талайгина ишларнинг бошланиш нуқтасидаги эшик тутқичини тутдингиз.
Тўхтанг! Бир зум шошилманг! Ҳеч нарса эсингиздан чиқмадими? Ортингизга бир назар солиб кўрингчи!
Бугунги мавқе, ҳурмат, эътибор ва гўзал турмушга эга бўлишингизда сизга кўмак бўлган ота-онангиз ҳолини сўраб, дуосини олдингизми?!
Уйғонишингиз билан сиз учун нонушта тайёрлайдиган, эгнингиздаги сизга ярашиб туган кийимларингизни покиза ҳолда тахт қилиб қўядиган аёлингизга бир оғиз раҳмат айтдингизми?!
Ишдан келишингизни кутиб-кутиб ухлаб қоладиган, сизни ўзининг қаҳрамони деб биладиган ва ҳозир сиз шошилиб ишга кетаётганингизда ортингиздан қўлчаларини силкиб турган фарзандингизни қучиб, пешонасидан ўпиб қўйдингизми?!
Улар сизнинг бойлигингиз! Яқинларингизни асранг!
Аҳрор Равшан
@Izhori_DIL
Следующая публикация
Нет комментариев