АҚШ маҳкамасида Нью-Йоркнинг Бруклин районидаги бир неча миллион долларлик пентҳаузда яшаб келган Кристина Мирбобоева¸ унинг эри Александр Копенкин ва Мирбобоеванинг онаси Ирина Фëдоровага ўтган ҳафта расмий айблов эълон қилинди.
Аксарияти собиқ СССР республикалари¸ хусусан¸ ўзбекистонликлар бўлган уюшган жиноий гуруҳга Бруклиндаги уйсиз ва қашшоқларни алдаш орқали АҚШ тиббий суғурта тизимидан қарийб 150 миллион долларни фирибгарлик йўли билан ўзлаштириш айби қўйилди.
Самарқанд Тиббиëт институтини битиргани айтилаëтган 35 яшар Мирбобоева бошчилик қилган мазкур гуруҳ¸ Бруклин прокуратурасига кўра¸ камида 20 шахс ва 14 корпорациядан таркиб топган ва 2015 йил январидан жорий йил ноябрига қадар фаолият юрғизган.
Бу жиноий схемага ишлаганлар орасида тўртта врач¸ хусусан¸ Нью-Йорк полиция департаментининг 61 яшар кардиологи¸ шунингдек ўзбекистонлик Суҳроб Қобилов ҳам бор.
Жиноий гуруҳ аъзолари ўз ўлжасини Бруклиндаги уйсизлар ва бепул овқат тарқатиладиган жойлар ва меҳнат биржаларида “овлаган”. Улар Medicaid ва Medicare тиббий суғуртаси картаси бор пулга муҳтож камбағалларга 40 доллар нақд бериб¸ ўз врачлари ишловчи клиникаларга олиб келишган.
Бу ерда уларнинг карта рақамини ëзиб олиб¸ гўë ҳар хил тиббий анализ ва муолажалар ўтказилди¸ деган сохта ҳужжатлар билан¸ суғурта тизимидан солиқ тўловчиларнинг миллионлаб доллари олиб турилган. Мижозлардан олинган ҳар хил тестларни гўëки анализ қилган врачларга ҳар бир анализ учун 50 доллардан нақд берилган.
Докторлардан бири - Robert Vaccarino икки йилдан камроқ вақт ичида ана шундай тестлардан 8000 тасига тиббий хулоса ëзиб берган ва бу хизмати учун¸ прокурорнинг айтишича¸ қарийб 1 миллион 400 минг доллар нақд олган.
“Очкўзликка берилган бу одамлар¸ кўпроқ Chanel сумкалари сотиб олиш учун энг заиф қатламни ўз ўлжаси қилиб олган¸” деди жиноий гуруҳга 878 пункт бўйича айблов эълон қилган Бруклин прокурори Эрик Гонзалес¸ хусусан¸ Мирбобоеванинг яшаш тарзи ҳақида гапира туриб.
Прокурорнинг айтишича¸ Франциянинг дунëга машҳур Chanel брэндининг шайдоси бўлган Кристина Мирбобоева ижтимоий тармоқларда ўзининг қимматбаҳо ҳаëт тарзи билан мақтаниб келган.
3 миллион 250 минг доллар нақд пулга олинган пенҳаузда яшаб келган Мирбобоева ҳар бир сумкасининг 6500 доллар экани¸ 6000 долларга бир шиша виски сотиб олганини кўз-кўз қилиб келган.
“Унинг таъби анча қиммат бўлган¸” деган маҳкамадаги чиқишида прокурор Гонзалес.
Маҳкама давомида Мирбобоеванинг уйидан олинган қимматбаҳо сумкалар¸ туфли қутиларига солинган 100 долларлик нақд пулларни ашëвий далил сифатида кўрсатилди. Айтилишича¸ тинтув пайтида жиноий гуруҳ етакчилари уйидан 700 минг доллар нақд пул мусодара қилинган¸ Мирбобоеванинг ўзи ҳибсга олинган.
АҚШ солиқ тўловчиларидан ўғирлагани аниқланган 146 миллион долларни қайтариш мақсадида Бруклин прокуратураси бу жиноий тўда аъзоларининг дунë бўйлаб 130 дан ошиқ банк ҳисобини музлатиб қўйган.
Мирбобоева бошчилигидаги гуруҳ аъзоларига қўйилган расмий айблар маҳкама давомида ўз тасдиғини топса¸ тўдабошилар 25 йилгача қамоққа ҳукм этилиши мумкин. https://www.ozodlik.org/a/aqsh-kristina-mirboboeva-medicare-samarqand/28909537.html
Присоединяйтесь к ОК, чтобы подписаться на группу и комментировать публикации.
Комментарии 66