Тонафты! Кодама валда и лямбе тя валсь. Тонафтыень тевсь сотф и шабань пеедемать, и тядянь кельгомать мархта.
Нильгемонь ветие киза Лариса Леонидовна Житаевась покодсь школаса. Вятезень мокшень кялень и литературань урокнень.
Тяни сон пенсияса, но кельгома тевонц колга аф юксни.
Мокшавась кассь учителень семьяса. Аляц Леонид Филиппович лама киза покодсь Сире Шайгавонь Акшов велень школаса. Тяка тевса заняфоль и акац Агафья Филлиповна. Лариса и оцю сазороц, Ирина, фалу сявондсть эздост пример. Аф стак синьге тусть тяка киге.
Н.П. Огарёвонь лемса университетть аделамда меле Лариса Леонидовна кучфоль работама Торбеевскяй райононь Салазгорь вели. А мзярда ётась эряма Ковылкинав, кар- мась покодема тостонь 4 № школаса, тонафтозень мокшень кяльти рузонь шабатнень.
– Улемс тонафтыкс – монь эряфонь кизе, – азозе Л.Л. Житаевась. – Сидеста лятфнесайне тядязень валонзон. Сон корхнесь, лацкас, кле, арьсек, кона киге тумс. Мон арьсень и вестенге ашень ужяльде, мес кочкайне учителень профессиять.
Лариса Леонидовнань уроконза кельговсть сембонди. И тя васендакиге сяс, мес сон кельгозень шабатнень. Макссезе теест седиень сембе лямбонц, крхка содамошинзон. Ульсь аф аньцек цебярь тонафтыкс, но и пара ялгакс, кона кулхцондсь эсост, макссесь цебярь советт. Старандась тиемс стане, штоба эрь валняц пачкодель шабать седис.
Урокта башка ётафнесь лама мероприятияда, коса шабатне наряжакшнесть национальнай щамса, морсесть мокшень морот, няфнесть сценкат.
Лариса Леонидовна коень-обуцянь кельги ломань. Тянди лама киза учениконзон, а тяни тонафтсыне уноконзон. Маша и Василиса щаваснон лангс ванозь пара мяльса наряжакшнихть мокшень щамса, морсихть шачема кяльса морот.
Маша тонафни 7-це класса. Шарфни оцю мяль семботи национальнайти. Щаванц мархта анокласть мокшень щамть колга исследовательскяй тев, кона районнай пялькстомаса занясь васенце васта.
Л.Л. Житаевась ломанць скромнай, аф кельгсы прянь шнафтоманц. И кда ни мезьсовок шнафты, то аньцек фкаса – учениконзон мархта, конат аф юкснесазь. Сидеста сувсихть инжикс, азонкшнихть эсь эряфснон колга. А нильгемонь ветие кизоста мзяра синь эздост ётась кядялганза. И сембе мяляфтсазь, кеняртькшнихть мархтонза васедемати. Учительницати тя оцю паваз.
Лац покодеманкса Л.Л. Житаевась казьф аф фкя грамотаса и казнеса. Сон – Мордовия Республикань Заслуженнай учитель. Тяни ваймоси, но школась ульсь и лядсь теенза омбоце кудкс. Тянемс эсонза пичетьфтихть школань тефне.
Сон пара мяльса сашенды школав, васетькшни тонафты ялганзон, иттнень мархта, кеняртькшни синь од тевснонды, сатфксснонды. Мокшавась павазу, мес эряфоц тянемс сотф школать мархта.
Наталья Садомская.
Присоединяйтесь к ОК, чтобы подписаться на группу и комментировать публикации.
Комментарии 5