Ни өчен Гайсә Мәсих, минем Коткаручы Раббым?
Дустым Гайсә Мәсихне үзеңнең шәхси Коткаручың дип кабул иттеңме?
Син җавап биргәнче, бу сорауны аңлатырга рөхсәт ит. Беренчедән, Гайсә Мәсихнең кем икәнен аңлау өчен, монда «шәхси» һәм «Коткаручы» дигән сүзләрне аңларга кирәк.
Гайсә Мәсих кем ул? Күпләр Гайсә Мәсихне яхшы кеше, Бөек остаз һәм хәтта Аллаһының пәйгамбәре дип таный. Бу чыннан да Гайсә Мәсихне сурәтли, ләкин Аның чынлыкта Кем булуын билгеләми.
Изге Язмада Гайсә тәндәге Алла, ягъни кеше булып киткән Алла дип әйтелә.
«Иң башта Сүз булган, Сүз Аллаһы белән булган, һәм Сүз Аллаһы булган...
... Сүз Кеше булды, безнең арада яшәде, мәрхәмәт вә хакыйкать белән тулы иде Ул. Без Аның данын, Атаның бердәнбер Углына биргән данын күрдек».
(Инҗил Яхъя 1:1, 14).
Раббы Гайсә безне дәваларга, төзәтергә, гөнаһларны кичерергә һәм безнең өчен үләргә җиргә төште! Гайсә Мәсих чиксез кодрәтле Ходай.
Коткаручы кем Ул, һәм ни өчен без Аңа мохтаҗ?
Изге Язмада без барыбыз да гөнаһ кылдык дип әйтелә, һәм бер генә тәкъва кеше дә юк.
«Изге язмада язылган бит: «Бер тәкъва кеше дә юк, бер генә дә. Акылга ия беркем дә юк, Аллаһыны эзләми беркем дә. Һәммәсе юлдан язган, бердәй бозылган; игелек кылучы күренми, берәү дә юк». «Ачык кабер базыдыр бугазлары, телләре белән алдыйлар, елан агуы сеңгән сүзләренә». «Аларның авызы ләгънәт һәм әрнү белән тулы». «Аяклары аларның кан түгәргә ашыга, йөргән юлларында бары җимереклек һәм кайгы гына кала. Иминлек юлын белмиләр алар». «Аллаһыдан курку хисе юк аларда».
(Инҗил Римлыларга 3:10-18).
Гөнаһыбыз аркасында без Аллаһының ачуына һәм җәзасына лаек. Ә мәңгелек һәм чиксез Аллага каршы кылынган гөнаһларыбыз өчен бердәнбер гадел вә чиксез җәза үлем.
«Гөнаһ өчен әҗер — үлем бит, ә инде Аллаһының мәрхәмәт белән бирелгән бүләге — Хакимебез Мәсих Гайсәдәге мәңгелек тормыш».
(Инҗил Римлыларга 6:23)
Кем Гайсә Мәсихне Коткаручы дип, кабул итми, Ходай рәсүле Яхъя Аллаһы аларга болай ди:
«Аннан соң мин зур ак тәхет һәм анда Утыручыны күрдем. Аның хозурыннан җир белән күк качты, һәм аларга урын табылмады. Тәхет каршында торучы үлгәннәрне – зурларны һәм кечеләрне күрдем. Китапларны ачтылар. Тормыш китабы дип аталган башка китапны да ачтылар. Китапларда язылганча, үлгәннәр үз эшләренә карата хөкем ителделәр. Диңгез үзендәге үлекләрне бирде. Үлем һәм үлеләр дөньясы да үзендәге үлекләрне бирделәр. Бу үлгән кешеләр һәркайсы үз эшләренә карата хөкем ителделәр. Үлем һәм үлеләр дөньясы утлы күлгә ыргытылдылар. Бу утлы күл – икенче үлем. Исеме Тормыш китабында табылмаган һәркем шул утлы күлгә ыргытылды».
(Инҗил Ачылыш 20:11-15).
Менә шуңа күрә безгә Коткаручы кирәк!
Гайсә Мәсих Күктәге тәхетен калдырып җиргә төште һәм безнең урынга үлем кабул итте. Аның тәндә Алла буларак үлеме, безнең гөнаһларыбыз өчен чиксез түләү булды.
«Без, Мәсих белән берләшеп, Аллаһы каршында акланган саналсын өчен, гөнаһсыз Мәсихне Аллаһы кешеләр кылган гөнаһлар өчен гаепле итте».
(Инҗил 2 Көринтлеләргә хат 5:21)
Ул безнең кылган гөнаһларыбыз өчен җәза алды һәм безгә моны эшләргә туры килмәсен өчен үлде.
«Әмма Аллаһы безгә булган мәхәббәтен шуның белән исбат итте: Мәсих гөнаһлы чагыбызда ук безнең хакка үлде». (Инҗил Римлыларга 5:8).
Ә Мәсихнең үлемнән терелүе, Аның үлеме безнең гонаһларны каплар өчен җитәрлек хак булуын исбатлый. Шуңа күрә Гайсә – безнең бердәнбер Коткаручыбыз!
Раббы Гайсә безгә Үзе болай ди:
«Мин – юл, хакыйкать һәм тормыш. Атам янына алып бара торган Миннән башка юл юк». (Инҗил Яхъя 14:6)
«Башка беркемдә дә котылу юлы юк. Җир йөзендә кешеләргә бирелгән исемнәр арасында безне коткарырдай башка исем юк...» (Инҗил Рәсүлләр 4:12)
Күпчелек кеше мәсихчеләр динен гыйбадәтханәгә бару, йолаларны үтәү һәм билгеле бер гөнаһлардан тыелу дип саный. Ләкин котылу өчен бу гына җитми әле. Чын мәсихчелек - ул Гайсә Мәсих белән шәхси мөнәсәбәтләр булдыру һәм Аны шәхси Коткаручы буларак кабул итү. Шушы вакытта гына без Аңы шәхсән Коткаручыбыз дип кабул итә алабыз. Беркем дә башкаларның иманы белән котыла алмый һәм беркем дә яхшы гамәлләре өчен генә гафу ителмәячәк.
Котылуның бердәнбер юлы - Гайсә Мәсихне үзеңнең Коткаручың дип кабул итү, Аның үлеме безнең гөнаһларыбыз өчен түләнгән һәм Аның терелүе безгә мәңгелек тормышта гарантия дип исбат итү.
«Аллаһы дөньяны шулкадәр яратты ки, Углына иман итүчеләрнең берсе дә һәлак булмасын, ә бәлки мәңгелек тормыш алсын өчен, Үзенең бердәнбер Углын бирде». (Инҗил Яхъя 3:16).
Аллаһы кешеләрне ярата. Ул безнең һәрберебезнең гөнаһларын кичерергә һәм безгә мәңгелек тормыш бүләк итәргә әзер.
Бәлки, сез үзегезне намуслы кеше дип саныйсыздыр?
Могаен сезнең кеше үтерүдә, урлашуда, зина кылуда гөнаһыгыз юктыр, ләкин үз гомерегездә кешеләрне, яисә Аллаһыны рәнҗеткән күп хаталар кылгансыздыр.
Сез, мин гомер буе бер кешене дә рәнҗетмәдем дип әйтә аласызмы?
Үзегезне алдамагыз: «... чөнки барысы да гөнаһ кылдылар һәм Аллаһының даныннан мәхрүм калдылар».
(Инҗил Римлыларга хат 3:23).
Аллаһы гадел, һәм Аның гаделлеге гөнаһ өчен үч алуны таләп итә. Ләкин Аллаһы кешене ярата, шуңа күрә ул үз Улын бирде. Бу безнең гөнаһларыбыз өчен хачта газап чиккән Гайсә Мәсихнең корбаны дигәнне аңлата: аны безнең урынга хачка кадаклаганнар.
«Мәсих тә бит, безне Аллаһы янына алып бару өчен, гаделсезләр урынына гадел Кеше буларак, гөнаһларыбыз өчен бер тапкыр һәм мәңгегә үлде. Аның тәне үлемгә тапшырылды, әмма Аллаһы Аны Үзенең Рухы белән терелтте». (Инҗил 1 Петердән хат 3:18)
Әгәр дә Сез Гайсә Мәсихне шәхси Коткаручы дип кабул итәргә телисез икән, Раббы Аллага түбәндәге сүзләрне әйтегез. Исегездә тотыгыз: дога үзе котылуга китерми, ә Гайсә Мәсихкә ихлас күңелегездән иман итү генә сезне гөнаһлардан коткара ала. Бу дога - сез Аллаһыга иман итүегезне һәм коткарылуыгыз өчен рәхмәтләрегезне белдерү генә.
Тәүбә итү догасы
Күктәге Атам! Мин сиңа догада киләм, үземнең гөнаһлы булуымны аңлыйм һәм таныйм. Аллам, синең улың Гайсә Мәсих исеме хакына барлык гөнаһларымны кичер һәм мине һәртөрле ялганнан чистарт.
Мин ышанам, Гайсә Мәсих минем гөнаһларым өчен хачта үлде һәм аклануым өчен өченче көнне терелде. Ходаем, зинһар, минем йөрәгемә кер һәм мине изгеләндер. Минем Көтүчем бул һәм бөтен тормышым белән җитәкчелек ит. Догамны ишеткәнең һәм мине кабул иткәнең өчен рәхмәт. Мин синең кичерүеңне һәм җанымны мәңгелек тормыш өчен коткаруыңны иман белән кабул итәм. Ата, Угыл һәм Изге Рух исеме белән. Амин!
Ихлас күңелдән дога кылсагыз, белегез: Раббы Аллаһыбыз сезне ишетте. Онытмагыз: Аллаһы — сезнең Күктәге Атагыз, ә Аллаһы Улы Гайсә Мәсих — Сезнең Коткаручыгыз һәм Раббыгыз, Изге Рух - сезнең Юатучыгыз һәм Остазыгыз. Бу өч Алла түгел, ә өч Шәхестән гыйбарәт бер Алла буларак безнең йөрәкләрдә чагылыш таба һәм табыр дип ышанам.
Аллаһы белән яшәгез, Изге Язмаларны укыгыз, дога кылыгыз һәм чын мәсихчеләр җыелышларына килегез.
«Изге язмада болай дип язылган бит: «Раббы исемен телгә алып, Аңа мөрәҗәгать иткән һәркем котылачак».
(Инҗил Римлыларга хат 10:13).
Фатихалы булыгыз!
Раил Азнай
