«Хакас тілі» искіріг эфирде.

Хайди постың палаларын хакас тілінең чоохтазарға ӱгредіп алары? Пӱӱнгі кӱнде пу сурығ полған на хакас сӧбірезінде турча полар.
Андағ сӧбірелерге полызып, піс хакас тілін ибде пик тут парчатхан сӧбірелернең таныстырчабыс. Арса, оларның пілістері пасхаларына тузалығ полар.
Пӱӱн пу сурыға Хакас ТВ-ның ӱн режиссеры Роман Максимович Чаптыков нандырча. Ол Галина Ефимовна паза Максим Константинович Чаптыковтарның очы оолғы полча.
Аның іҷезі Галина Ефимовна «Хакас чирі» газетаның хабарҷызы полған, сағам тынағда. Пабазы Максим Константинович «Хакас чирі» газетаның устағҷызы полған, соонаң ХР-ның Ӧӧркі Чӧбінде тоғынған.
Роман Чаптыков Ағбанда тӧреен паза ӧскен. Ол олған садына чӧрбеен, школада хакас тілін ӱгренмеен. Оларның сӧбіреде ӧӧн тіл — хакас тілі полған. Анаңар ол улуғ алғызын ууҷаларына паза іҷе-пабазына читірче. Олар ибде сыбыра хакас тілінең чоохтасханнаңар, амды мин хакас тілінең чоохтасчам тіпче ол.#ХакасРадио