1912 йил 10 апрель куни "Титаник" Саутгемптондан Нью Йоркка қараб, Атлантика океани бўйлаб сафарга чиққанида кема бортида 1317 нафар йўловчи ва 908 нафар экипаж аъзолари, жами 2225 нафар инсонлар бор эди. Титаникка чиққан инсонларнинг аксарияти ўзларини ҳаммадан кўра бахтиёр ҳисоблар, бундай улкан кема бортига чиқиш ҳаммага ҳам насиб қилмаганидан ғурурланар эдилар. Кема айсберг билан тўқнашгунига қадар инсонларда чексиз ҳурсандчилик, саёҳатга чиққан вақтда инсонларда кузатиладиган сокинлик, хотиржамлик бор эди. 1912 йил 14 апрель куни соат 23.40 да Титаник айсберг билан тўқнашди. Кемани муқаррар чўкиши 1 соат ичида аниқ бўлганидан сўнг бортдаги барча инсонлар талвасага тушди, энг хавотирга туширган ҳолат кемадаги қутқарув қайиқлари барча инсонларга етмаслиги маълум бўлган эди. Кема узоғи билан 3-4 соатда уммон тубига ғарқ бўлиши, бу тун ўзлари учун энг охирги тун бўлишини аввалдан ҳис этиш улар учун даҳшатли ва оғир эди. Аввалги ҳурсандчилик, ғурурланиш, хотиржамлик ўрнини эндиликда жуда кучли қўрқув, ваҳима, тушкунлик ва хавотир туйғулари эгаллаганди. Тўқнашувга қадар ҳеч ким эътибор ҳам бермаган қутқарув қайиқлари бортдаги инсонлар учун энди ягона нажот бўлиб туюлар эди. Лекин "нажот қайиғи" ҳаммага ҳам насиб қилмади. Оқибатда Титаник билан бирга 1513 нафар инсон Атлантика уммони тубига ғарқ бўлди. "Нажот қайиғи"га ўтирган 712 нафар инсонлар қутқариб қолинди.
Азиз дўстим! Аслида биз яшаётган ҳаёт ҳам шу сафарга ўхшамайдими? Ҳаёт уммонида тўхтовсиз сузяпмизку! Эски "ҳамсафарлар"дан қанчаси ўтиб кетди, қанча қариндошлар, яқинларимиз, дўстларимиз, биз таниган ва танимаганлар ҳаёт деб аталадиган кемани тарк этишди? Жуда кўпчилик! Кўпчилигимиз ожизона фикрлаб айтадиган жумла билан айтадиган бўлсак, "бевақт кетганлар" ҳам анчагина! Лекин, "НАЖОТ" топганлар қанча экан?!
Азиз дўстим!
Ҳаёт кемасида сузар эканмиз, кемадаги ширин сафар бир куни ҳеч шубҳасиз тугашини, бир куни Сен ҳам албатта кемадан туширилишингни ҳеч ўйлаб кўрдингми? Ҳаёт кемасида нажот топмасдан, ғарқ бўлаётганлар ҳақидачи? Кемадан тушсак, "нажот қайиғи" бизга ҳам насиб қилармикан? "НАЖОТ" топмасакчи?!
Азиз биродарим! Муслима синглим! Сени ҳурсанд қилаётган, хафа қилаётган, ғурурлантираётган, камситаётган бу дунёдаги умринг бир куни тугайди! Қанча қолгани ёлғиз Оллоҳ таолога аён! Балки кўпи кетиб, ози қолгандир! Ҳали "ҳаёт кемаси"да эканмиз, "нажот қайиғи"ни топиш, уни қуриш имкони бор! Кемадан тушишликка тайёрмисан? Кемадан тушгандан кейин "нажот қайиғи"ни топиш имкони йўқ! "Нажот" топмаганлар жаҳаннамга ғарқ бўлиши аниқ! "Нажот"га фақатгина Оллоҳ таолога ибодат қилиб, солиҳ амалларни қилибгина эришиш, фақатгина шу тарзда "нажот қайиғи"ни қуриш мумкин! Бошқа йўли йўқ! Чунки Оллоҳ таоло Қуръони каримда инсонларни фақатгина Ўзига ибодат қилишлари учун яратганини (Зориёт, 56) таъкидлаб, имон келтирганлар, намозни тўкис ўқиганлар ва ўзларига ризқ қилиб берилган нарсалардан бошқаларга нафақа қилувчилар, Оллоҳ таоло нозил қилган Қуръони карим ва бошқа илоҳий китобларга имон келтирганлар, охират кунига қаттиқ ишонувчилар - мана шулар Роббиларидан бўлган ҳидоятда, яъни тўғри йўлда эканликлари ва айнан улар "НАЖОТ" топгувчи эканликларини баён қилган (Бақара сураси 3-5 оятлар). "НАЖОТ" топгувчилар дўзахдан, жаҳаннам тубига ғарқ бўлишликдан омонликда бўлиб, Оллоҳ таолонинг раҳмати ила қилган амаллари туфайли жаннатдан абадий макон топганлардир!
Имконият борида "нажот қайиғи"ни Оллоҳ таолога ибодат қилиш йўли билан барпо қилишга киришайлик! Зеро ҳаёт кемасида сафар қилиш ҳаммамизга фақатгина бир маротаба насиб қилади! "Нажот қайиғи"ни ҳаёт сафари давомида қурмас эканмиз, сафардан кейин бундай имконият берилмайди! Имконият эса тобора камайиб бормоқда! Беамал бўлиб, фақатгина орзу қилиш билан нажотга эришиб бўлмайди!
Оллоҳ таоло барчаларимизни икки дунёда нажот топгувчи бандаларидан қилсин!
Присоединяйтесь к ОК, чтобы подписаться на группу и комментировать публикации.
Комментарии 2