Фёдор Петрович Матюшкин - содаф мокшень поэт.

Тячи тейнза топодсь 70 киза. Сон шачсь 14-це январьста 1955- це кизоня Уржа велеса Сире Шайговонь аймакса. Тонафнесь Мокшэрзянь университетса, покодсь «Мокша» журналса. Нинге шабакс пингста бабанц ёфксонза фкяняньбес ванфтовсть поэтть седисонза-ваймосонза и пингонь-пингонь кяльбрястонза прашендыхть седиень эжди стихотвореникс. Поэтть васенце стихонза лисендсть «Мокша» журналть лопанянзон эса и тяниень пингти тоса печатлакшневихть. Пингонь ётазь сонь творчествац келемсь, башка книгакс кочкафт азксонза, стихонза: «Вармать мархта крганьбяльцек» (2012), «Мокшень сёрмат» (2023), «Эсь ширесь терди» (2023).Ф. П. Матюшкин. эсь произведениянзон эса шарфты мяль шачема ширети, перьфпяльти, кельгомати.
«Шачема краезе».
Ой, вирьге, вирьге, вирнява,
Авань куду виркянява.
Саян – кафту яви вирсь.
Нармоннятне – пиже налга
Паргана пря шуфттнень алгат,
Молян – мархтон моли пирсь!
И юкстаф тя вирень кись.
Ведь и тише, лоткть лангс лотка,
Вармань яжаф – туркс праф шочка,
Мезе пингсь сей кадсь и тись?!
Лисень вирьста, вирть трвава
Валган Юрожонь лугава,
Шумбрат, Крайняй, пиже рай!
Вай, луга, луга – лугава,
Тюжя янняня кучкават
Лихтибрянять вакска прай.
И аф аньцек мон лтамстон –
Тяса ламотне эрь самстост
Ведняти «спасиба» азсть.
Тонадыне кальдяв китнень…
Ару веднясь, валда шитне
Кафта вии пацят казсть.
Ф. Матюшкин
«Вайгяль» радиопрограммась арьси мокшень смузю поэтоньконди валда китт- ятт, оцю сатфкст творчествасонза, кеме шумбраши и паваз.