мои

Сарыш наҥгайыме мари пӧръеҥ верч кажне кечын кумалме мут

Ош Поро Кугу Юмо, Тӱня Юмо, Кугу Серлагыш Юмо, Пӱрышӧ Юмо, Мер Кугу Юмо, Ош Кече Ава, Поро Шочын Ава, Поро Мланде Ава, Вуйӱмбал Суксо, Вуйӱмбал Серлагыш, Сурт Юмо, Корно Оза, а теве таче кече ваштареш шогалын пелештен шогем. Мӱндыр мландыште, пошкудо элыште, кугу тӱнямбалысе сарыште улшо иза-шольо, ача-эрге да чыла мари пӧръеҥ верчын сӧрвален кумалын шогем. Чыла мари калыкетым, пошкудо калыкетым да моло тӱнямбал калыкетым арален серлагенак шогыза. Сар тул когартыме деч, шокшо вӱр йоктарыме деч саклен арален шогыза. Ончык илыш корным волгалтарен шогыза. Кугу тул деч, кугу вӱд деч, кумдан шарлыше чер деч, йӱштӧ кӱртньӧ деч, аяр пычалтар деч, сар шӱлыш деч, ир янлык деч, осал еҥ деч, еҥ осал деч, тура лавыра мут дечын да йоҥылыш ыштыме дечын тичмаш аралтыш ден арален серлаген шогыза. Илыш корным вияшым ыштен, волгалтарен, у кӱкшытыш кӱзыктен, шке илыме верышке мӧҥгыш савыртен, чын корно дене ошкылаш, таза шке ешышке пӧртылаш полшен шогыза. Поро шӱлышан еҥым, полшаш шонышо, мелын шогышо еҥ-влакым родемын ончыко илыш корныш луктын шогалтыза. Осал шӱлышан еҥ тӱшкам, ыштыме сомылым чараш шонышо да тореш шогышо еҥ-влакым, тора деч тора, мӱндыр деч мӱндыр ӧрдыж корныш кораҥден колтыза да осал шӱлышым шулыктен пытарен колтыза. Пӱтынь марий калыклан ший тӱсан волгыдо аралтыш лийза да илышаш кече дене толын товылен толын йывыртыктен шогыза. Пелештыме мутем шотыш налын, ашым ыштен, йӧратен налын шогыза. Кавыл лийже. Алал лийже! !!! Пагалыме мари родем-влак. Тиде пелештыме мутым мари коклаште кумдан шарен колтыза! Кажне кечын алал чон кумыл дене кумалаш кӱлеш. Тыныс лийже мемнан илыште да ончыкжат поро пиалан, перкан илыш волгалт шогыжо. Илышаш кечына куандарен толжо. #чийӱла #пелештымемут #онаеҥ #сугынь #тыныслийже