Доман аз чанги ғами ёр раҳо хоҳам кард

Гиреҳ аз кори дили хун шуда во хоҳам кард
Дар диле нест нишоне зи вафо манҳам низ
Гар кунад умр вафо , тарки вафо хоҳам кард
Пойи як гул нанишинам ки чунин хор шавам
Баъд аз ин рақскунон кори сабо хоҳам кард
Ҳайф , одат ба вафо карда дили хун шудаам
В-ар на мегуфтам аз ин беш чиҳо хоҳам кард
На хато шуд ба Худо , то тану ҷонам бошад
Сабр бар ҷабру таҳаммул ба ҷафо хоҳам кард
Қимати ҳар гуҳари ашк яке бӯсаи туст
То нагӯи ки туро муфт раҳо хоҳам кард
Гар диҳад чарх ба ман навбате аз боди кашон
Ба Худо майкадае вақфи шумо хоҳам кард
Тавба кардам ки дигар тавбаи беҷо накунам
То бувад умр ба ин аҳд вафо хоҳам кард
Эй Имод аз шикани турраи ман шиква макун
Сабр кун як рӯз дарди ту даво хоҳам кард.