Қуёшсиз қолса гар бирор кун,

Гулларсиз қолса ҳам баҳорлар.
Дунёда одамдек яшашчун,
Раҳмсиз бўлманглар одамлар,
Меҳрсиз бўлманглар одамлар!
Ҳаромнинг кўзлари сузилган,
Жигарла ришталар узилган,
Эр даюс, аёли бузилган,
Раҳмсиз бўлманглар одамлар,
Меҳрсиз бўлманглар одамлар!
Қақраган масканда гул унмас,
Беғубор юракка ғам тўлмас,
Саҳоват эгаси кам бўлмас,
Раҳмсиз бўлманглар одамлар,
Меҳрсиз бўлманглар одамлар!
Дил хаста бўлса гар даво йўқ,
Дунёнинг ўзида вафо йўқ,
Одамдан келмаса жафо йўқ!
Раҳмсиз бўлманглар одамлар,
Меҳрсиз бўлманглар одамлар!
Кўз тикиб ўзганинг молига,
Бировни қўймасдан ҳолига,
Қай юзла борурмиз ёнига,
Раҳмсиз бўлманглар одамлар,
Меҳрсиз бўлманглар одамлар!
Давлат деб иймонла терслашиб,
Ҳавас деб чин ёрга қўрслашиб,
Кибр ва ҳасадла дўстлашиб,
Раҳмсиз бўлманглар одамлар,
Меҳрсиз бўлманглар одамлар!
Ғайр қалб эгаси ғамдадир,
Ҳаққингиз қолмагай кимдадир,
Олам ҳам охирги дамдадир!
Раҳмсиз бўлманглар одамлар,
Меҳрсиз бўлманглар одамлар!
Малика Тавфиқ.