Навагодняя сняжынка.(казка)
**********************************
Мароз скаваў рэчку. Размаляваў шыбы вокнаў. У іскрамётным танцы кружыліся драбнюткія сняжынкі, закідваючы сцежкі, поле, сенакос. Апранаючы ў белыя футры дрэвы. Прыбліжаўся новы год.
- Вецер, ты куды ляціш? – запыталася маленькая сняжынка ў крылатага ветрыка, - прызнавайся!
- Ды ў лес. Папрасіў мяне дзядуля Мароз, каб разбудзіў Снягурачку. Баіцца, хаця б не праспала свята. Ты ж, я думаю, ведаеш, што на ёлку святочную абавязкова прыходзіць дзед Мароз з унучкаю. Дзеткі вершы ім чытаюць. Спяваюць песні. Альбо танчаць. А дзед Мароз і Снягурка частуюць іх цукеркамі. А потым яшчэ павінны абысці ўсіх дзяцей і ўручыць ім навагоднія падарункі.
- Во, во. Хапае ім спраў у навагоднюю ночку. І як толькі паспяваюць? – згадзілася сняжынка, - а ведаеш што? Давай мы ім дапаможам.
- Як?
- Дзядуля ж спачатку да лясных жыхароў пойдзе?
- І што?
- Дык мы з табою прыспешым іх. Каб не застаўлялі сябе чакаць.
- Ну давай паспрабуем, - згадзіўся ветрык, толькі ж мне Снягурачку трэба разбудзіць, - раптам успомніў ён.
- Паспееш. Мы хуценька.
І яны паімчалі ў лес..
- Э-ге-ге-гей! – на ўсю моц закрычаў вецер, - даволі спаць! Выходзьце ўсе на паляну. Новы год сустракаць будзем!
- Угу! Угу! – адазваўся філін.
- Дзе? Што? – застракатала сарока.
- Ну, не дадуць паспаць...- незадаволена буркнуў мядзведзь
і, перавярнуўшыся на другі бок, захроп яшчэ смачней.
- Напэўна, там і падарункі будуць? - нясмела запытаўся зайчык, - а куды бегчы?
- Ты што, глухі? – не сунімалася белабокая, - на паляну. Учора ж мы ўсе разам ёлачку ўпрыгожвалі. Ці ты памяць згубіў? – накінулася яна на длінналыгага.
- А я ўчора да бабулі Насты бегаў, - апраўдваўся касы, - папрасіла, каб дроў накалоў. Старая ж зусім. Дапамагчы некаму. Дзеці далёка ў горадзе. Маразы цісканулі. Хату выстудзілі. Ды і хата старая. Такая ж, як і сама бабуля. Ні да ёлкі мне было. Ратаваў бабку ад холаду. Яна ж мяне таксама ратуе.
- Чы-чы-чы, - стракатала сарока, - ад чаго гэта ратуе яна цябе?
- Ад голаду. То морквай пачастуе, то капусткай. Ды і ты не супраць кавалачак сала, які яна сінічкам чапляе, з кармушкі сцягнуць. Толькі не аднеквайся, бачыў я.
- Ды ну цябе, прычапіўся, - і сарока ўмомант знікла.
А на палянцы каля ёлачкі ў вясёлым карагодзе ўжо дружна танчылі вавёркі, ласі, зайчыкі і іншыя лясныя жыхары. Дзед Мароз павіншаваў іх са святам. Сеў у свае распісныя драўляныя сані і паімчаў у Палац Культуры, дзе яго з нецярпеннем чакалі дзеці.
- Добры дзень, мае любыя! Ой, колькі вас тут!. А дзе ж мая ўнучачка? Мабыць, заблудзілася? А давайце ўсе разам паклічам яе.
- Снягурачка! Снягурачка! - у адзін голас закрычалі дзеці.
І тут з навагодняй сняжынкай у руцэ з’явілася Снягурачка:
- Ой, ледзьве не праспала, усміхнулася яна.
Дзеці сталі ў карагод. А сняжынка,напяваючы навагоднюю песеньку, весела кружылася над імі. Гляньце, яна і зараз лятае каля вашага акенца, сняжыначка гэта, навагодняя.
А зараз дабранач, даражэнькія.
16.12 – 2016г.
https://www.youtube.com/watch?v=lj3bahXs8AQ&t=119s
Присоединяйтесь к ОК, чтобы подписаться на группу и комментировать публикации.
Нет комментариев