Вакансий ярмиҥга

«ПрофФест. Работа в России. Время возможностей» всероссийский проект почеш 27 июньышто республикысе олала ден районлаште вакансий ярмиҥгам эртарат.
Тӱҥ площадкыштыже - Уфасе «Торатау» конгресс-холлышто 10 шагат эр гычак HR-клуб, профориентаций, у шинчымашым налме, инклюзивный паша верым мумо площадка-влак ышташ тӱҥалыт.
«Ярмиҥгаш 1000 наре работодатель ушнышаш, нуно 14 тӱжем вакансийым темлат. Тиде «Башнефть», УМПО, Транснефть-Урал, Сбербанк, «Башавтотранс», «Нефаз» да молат», - каласен республикысе «Работа в России» кадр рӱдерын директоржо Ридан Ахьямов.
Ӱдыр-рвезе-влакат кеҥеж каныш жаплан келшыше пашам верешт кертыт. Ярмиҥгаште нуным резюмем, портфолиом чумыраш, мутланаш мийымышт годым шкешт нерген кузе каласкалаш, пашаште шкеныштым чын кучаш туныктат, воза «Башинформ».
Э. АПТУЛМАНОВА