Яна кел, эй Рамазон!

Билмам, кўнгиллардан кетдими ғубор,
Сенинг поёнингда минг надомат бор.
Ойларнинг султони моҳи Рамазаон,
Яна кел, биз сени кутармиз ночор!
Кутди-гу, даъволар чиқмади тетик,
Бизни ғолиб этди юз минглаб ҳадик.
Афсусда турибмиз ҳар доимгидек,
Яна кел, биз сени кутармиз ночор!
Рўзалар тилгамас, дилдадир тахир,
Таровеҳ кўнгилга бўлганда оғир.
Шамолдан тез келиб кетдинг-ку ахир,
Яна кел, биз сени кутармиз ночор!
Қалбни тоат учун яна сиқмадик,
Ўн бир ой санқиган дардни йиқмадик.
Онадан туғилган каби чиқмадик,
Яна кел, биз сени кутармиз ночор!
Қачон бў телба дил Ҳакни ҳам англар?!
Моғор босган ичдан кетарми чанглар?!
Ортингдан "Ал-фироқ" садоси янграр,
Яна кел, биз сени кутармиз ночор!
Фақат Робб таъолодон сўрабон нажот,
Бизни манзил сари йўллар чин қанот.
Ўн бир ой ичида топмайлик вафот,
Яна кел, биз сени кутармиз ночор!
Мен ҳам саодатга етарман бир кун,
Қалбимда емирилар Илоҳий тугун,
Шайтонни занжирбанд этмаклик учун
Яна кел, биз сени кутармиз ночор!
Мўминлар айёмин нишонлаб бўлгач,
Фарз дебон, Маккага қилгусилар ҳаж.
Шундан сўнг бошланар жами кулфат, ранж,
Яна кел, биз сени кутармиз ночор!
Рамазон, биз сени яхши кўрамиз,
Бў телба муҳитда хорғин юрамиз.
Аллоҳ насиб қилса, кутиб турамиз,
Яна кел, биз сени кутармиз ночор!
Ҳайрулла Ҳамидов ижодидан!