Обаманинг шарҳи Twitter тарихида энг кўп ўқилган твит бўлди
АҚШнинг собиқ президенти Барак Обама Шарлотсвиллдаги тўқнашувларга муносабат билдириб Нельсон Манделладан келтирган иқтибос Twitter тарихидаги энг кўп ўқилган шарх бўлди.
Twitter ижтимоий тармоғида қолдирилган шарҳларнинг оммалашуви статистикасини кузатиб борувчи Favstar нашрининг билдиришича, Обаманинг шарҳини 2 миллион 800 минг одам “лайк” қилган. 1 миллион 150 минг фойдаланувчи эса бу шарҳ билан бўлишган.
Обама Twitter саҳифасида ЖАРнинг собиқ президенти Нельсон Манделладан иқтибос келтирган эди.
“Ҳеч ким бошқа бир одамга танасининг ранги, келиб чиқиши ёки динига нисбатан нафрат билан туғилмайди. Одамлар нафратланишга ўрганишади ва агар улар нафратга ўрганаётган экан, демак уларни муҳаббатга ҳам ўргатишга ҳаракат қилиш лозим. Негаки муҳаббат инсон юрагига яқинроқдир”, деган иқтибосни Обама Twitter шарҳлари кўлами чеклангани учун уч қисмга бўлиб эълон қилган.
Шунингдек, Обама твитнинг биринчи қисмига Мэрилед штатидаги боғчалардан бирида тушган суратини эълон қилган. Суратда Обамага турли ирқ ва миллат болалари қараб тургани акс этган.
Twitter тармоғида бундан олдинги энг кўп ўқилган твит қўшиқчи Ариана Грандега тегишли эди. Гранде Манчестерда концерт бераётган пайтда портлаш содир бўлган. Шундан сўнг қўшиқчи “Чин юракдан чуқур қайғудаман. Сўз айтишга ожизман”,деган шарҳни қолдирган эди.
12 август куни Виржиния штатининг Шарлотсвилл шаҳрида оқ ирқчилар билан ўнг қанот фаоллар ва уларга қаршилар ўтказган намойиш иштирокчиларига автомобиль билан ҳужум қилинган эди.
Ҳужум натижасида бир аёл ҳалок бўлди, 19 одам жароҳатланди. Намойишчилар устига автомобиль билан бостириб борган 20 яшар Жеймс Алекс Филдс қўлга олиниб, унга қарши иш очилди.
Шарлотсвиллдаги намойиш ўтказилишига маҳаллий ҳукуматнинг АҚШдаги ватандошлик урушида қуллик тарафдорлари қўмондонларидан бири бўлган генерал Роберт Лига ўрнатилган ҳайкални олиб ташлаш қарори сабаб бўлган.
Президент Трамп дастлаб Шарлотсвиллдаги тартибсизликларда “барча томонларни” айблади. Бироқ унинг бу баёноти танқидларга учраганидан сўнг Оқ Уй Трамп “Ирқчилик бу ëвузлик ва ирқчилик номидан зўравонлик қилганлар¸ жиноятчи ва қотиллардир”, деб баёнот берганини эълон қилди.
https://www.ozodlik.org/a/28679368.html
Угри кариса супи,булади деган гаплар бор. 8 йил дунёни огдар тунтар килиб энди иркчиликка карши чикяпмиз. Ливияни хонавайро килдик. Сурия ва ирокда канча бегунох инсонларни конини тукдик. Канча болалар етим колди, курбон булди. Булар хам инсон эди. Улар хам фони дунёда яшаши ва элига манфат келтириши керак эди . Америкаликлар тинч фаровон яшаши учун осиё , африкада,европада кимлардир ...
Комментарии 67
onasnin qornida ozixam hatto turli mish mishlar bilan dunyoga kelgan