Бир ой ижара ҳақини тўлолмаган муҳожир пичоқланди - BBC O'zbek
Москвада ижара ҳақини 1 ой тўлай олмагани сабабли 36 ёшли Улуғбек Умаров хонадон эгасининг таниши томонидан пичоқланди.
"Мен уларга 1 ойга қарз бўлиб қолдим. Сабаби, уйга таътилга кетгандим. Қайтиб келаман деб, у ерда кийиму буюмларимни қолдирганман. Тўғри, бир иш билан уйда иккинчи ойга қолиб кетдим. Келишимга яқин уй эгаси қачон келишимни сўраб тинмай телефон қилди. Вақтини айтдим. Кеч соат 18 яримларда бир оғайним билан ижара уйимга бордик" - воқеани гапириб берди Улуғбек.
Унга кўра, 23 октябрь куни Варшавское шоссе кўчаси 54-уйда Улуғбекни уй эгасининг келини ва грузин миллатига мансуб нотаниш шахс кутиб олган. Бир ой учун тўланмай қолган ижара ҳақи юзасидан можаро бўлиб ўтган.
- Ёнимда 17000 рубль ва 2200 АҚШ доллари миқдорида пулим бор эди. 15 минг рублни ижара учун бераман, деб боргандим. Аммо мендан пулни 2 баробар (30 000 рубль) тўлашимни талаб қилди, - дейди Улуғбек.
Можаро ортидан нотаниш шахс Улуғбекнинг чап кўксига пичоқ санчган.
- Олти дақиқача ўзимни йўқотганим йўқ. Уй эгасини келини "пул-пул, пулни опкел" деб бақирди. Зўрға сумкамни очиб, 17 000 рубль пулни олиб унга бердим. Ташқари йўлакка чиқиб, ўша ерда ағдарилиб йиқилдим.
Улуғбекнинг ҳамроҳи қўшнилар полиция ва "Тез ёрдам" чақиришгани ва шу воқеалар оралигида унинг қолган пуллари йўқолганини айтади.
Жиноят содир қилган шахс Москва Жанубий маъмурий ҳудуд полиция ходимлари томонидан қўлга олинган.
- 23 октябрь куни кеч соат 19 ларда пичоқ билан босқинчилик қилинганлиги ҳақида маълумот келиб тушган. Айбланувчи ҳибсга олинган. Айни пайтда тергов-суриштирув ишлари олиб борилаяпти, - маълумотни тасдиқлади Нагатино-Садовники тумани полиция бўлими навбатчиси.
Туман тергов қўмитаси айбланувчининг ёнидан 900 доллар ва 1000 рубль пул топилгани ҳақида маълумот берди.
Улуғбек Умаров 8 кун жонлантириш бўлимида, сўнгра 7 кун шифохонада даволанган. Айни пайтда клиниканинг кундузги бўлимида соғлигини тиклаш муолажаларини давом эттирмоқда.
Улуғбек унга адвокат ва таржимон берилмагани, тергов ишлари ташлаб қўйилгани, унинг жонига қасд қилишни уюштирган уй эгасига чора кўрилмаётганидан норозилигини билдирмоқда.
"Буларнинг ҳаммаси ўзбеклигим учун, деб ўйлайман" - дейди Улуғбек.
- Соғлигимни йўқотдим. 5-6 ой ишлай олмайман. На пулим бор, на соғлигим. Ўша 900 долларимни ҳам беришмаяпти, иш чўзилиб кетаяпти. Ҳозир тергов жараёнидалиги учун уйга кетишимга ҳам рухсат беришмаяпти. Жуда қийин аҳволдаман, буни сўз билан тушунтира олмайман.
Би-би-си Ўзбек хизматининг видеоларини www.bbcuzbek.com да ҳам кўришингиз мумкин.
Показать еще
Присоединяйтесь — мы покажем вам много интересного
Присоединяйтесь к ОК, чтобы посмотреть больше интересных видео и найти новых друзей.