Ягонае панаванне — гэта перыяд палітычнага заняпаду Рэчы Паспалітай, спробы рэформаў і ўмацавання дзяржаўнага ладу краіны, інтэрвенцыі Расеі і яе саюзніка Прусіі. Гэта час, калі суседнія манархіі — Расея, Прусія і Аўстрыя — дзялілі тэрыторыю дзяржавы, калі патрыятычныя сілы ў Польшчы, Літве і Беларусі на чале з Тадэвушам Касцюшкам узняліся на ўзброенае паўстанне, каб ратаваць незалежнасць радзімы. Станіслаў Аўгуст Панятоўскі нарадзіўся 17 студзеня 1732 года ў Воўчыне , у маёнтку свайго бацькі. Ён быў чацвёртым сынам. Атрымаў добрыя выхаванне і адукацыю. Малады чалавек быў інтэлігентным, здольным, з мяккім характарам. Ён, як было заведзена ў магнацкіх сем"ях, удасканальваў свае веды падчас падарожжаў у Эўропу — у Францыю і Ангельшчыну праз Нямеччыну.