Tənhalaşıb dərdə, qəmə batmayın,

Özünüzü oda, közə atmayın,
Bu yağan yağışa çətir tutmayın,
Bu yağan yağışda sevgi ətri var.
Qızıl gözəllikdi, dürr gözəllikdi,
Varsa gözəllikdə sirr, gözəllikdi,
Hər düşən damcısı bir gözəllikdi,
Bu yağan yağışda sevgi ətri var.
Nə hava dəyişsin, nə günəş çıxsın,
Nə zaman tələssin, nə ömür axsın,
Yağsın səhərədək, kaş elə yağsın...
Bu yağan yağışda sevgi ətri var.
Ağlayam, yağış da bir ucdan yağa,
Yağa damcı-damcı, hey döyə məni.
Bu yağış sevgiyə öyrədə məni,
Bu yağış sevgiyə səsləyə məni...