Эң касиеттүү амал ... Салават айтуунун пайдалары деңиздин көбүгүндөй көп тура . Арышы алыс өзүнчө бир чалкып жаткан көл тура . Анда эмесе бермет сымал тамчыларын сабалата жазайын . Ихлас кылып Кудайымдын мээримини табайын . Эки жүз миң хадисти жана имам Ахмад бин Ханбал рохимахуллохтун « Муснадын » жатка билген амалкөй такыба аалым - Абдуллах Сиражуддин Хусейний устазыбыздын : « Эртели кеч окула турган дубалар жана зикирлер » аттуу пайдалуу китебинин 119 -бетинде салават айтуунун негизги 20 пайдасын эскерип жазып кеткен . Эскерте кетүүчү нерсе : Ал пайдаларды Курандын ишараттарынан жана аздектүү хадистерден , айтылуу аалымдардын сөздөрүнөн жана туура жолду туу тутуп , илим менен амалды айкалыштыра кармаган олуя заттардын топтогон тажрыйбаларынан алып жазган . Эмесе шейх Абдулла Сиражуддин рохимахуллох эскерген салаваттын эң зарыл үлкөн пайдалары : 1- Периштелердин алкышына арзыйт . 2- Салаватты көп айткан адамга оболу Алланын , андан соң анын асыл пайгамбары Мухаммад саллаллооху алейхи ва салламдын жана периштелердин салам жолдоосу болот . 3- Салаватты айтуу менен менен дуба тилектери кабыл болот . 4 - Акыр кыяматта азирети сүйүктүү пайгамбарыбыз саллаллооху алейхи ва салламдын жалпы шапаатынан сырткары , жекече колдоо көрсөтүүсү менен толук кепилдигине эгедер болот. 5 - Ал себептүү кетирген кемчилик күнөө иштери кечирилип , даражасы өсүп , зоболосу бийиктейт . 6 - Кедейликти кетирип , кайгы муңдан арылтып , жан дүйнөнүн руханий оорусуна шыпаа, дартына даба болот . 7 - Салават баардык ааламда ээси үчүн коштоп жүргөн нур болмокчу . Бул жалган жашоодо , кабырда , махшар майданында , а түгүл түбөлүк бактылуулук жери болгон бейиштин өзүндө дагы жаркыраган нур болот . 8 - Өлүм саатынан алдыңкы көз ирмемдеринде аны көп айткан адам үчүн бейиш менен сүйүнчүлөгөн жагымдуу куш кабар болот . 9 - Аны айткан адамдын жана атасынын аты сүйүктүү асыл пайгамбарыбыз саллаллооху алейхи ва салламга жеткизилип эскерилет . 10 - Пайгамбарыбыз саллаллоху алейхи ва салламдын сүйүүсүнө балкыйт . 11- Кабырда ( барзах ааламында ) азирети асыл пайгамбарыбыз саллаллооху алейхи ва саллам менен байланыш түзүлүүсүнө өбөлгө түзүлөт . 12 - Эсине түшүрө албай жаткан нерсесин салават айтуу менен эстей алат . Салаватты такай айтып жүрүү - унутчаактыктын алдын алат . 13- Жан дүйнөсүнүн үрөйүн учуруп кыжаалатка салып , түйшөлтүп турган чоң коркунучтан сактап , амандык менен тынчтык жана бейпилдик алып келет . 14- Салават айтуу жүрөктөрдүн тирүү жашоосуна жана көкүрөктөрдүн жибип кеңейишине , жан дүйнөнүн сүйүнүчкө бөлөнүшүнө шарт түзөт . 15- Салават периштелердин сыйына жана ал үчүн атайын дуба кылышына себеп болот . 16- Алланын каар азабынан сактайт . Кембагал адамдын айткан салаваттары - садака менен зекеттин ордун басат . 17- Кыяматтагы мээ кайнаткан ысыкта арштын көлөкөсүнө саялап эс алууга себеп болот . 18- Акыретте баардык калайык мурда болуп көрбөгөндөй катуу чаңкоого туушукканда ,салават ээси андан амандыкта боло алат . 19- Сырат көпүрөсүндө кадамдардын тайып кетпей , бекем болуусуна жагдай түзөт . 20- Асыл пайгамбарыбыз саллаллооху алейхи ва салламдын кепилдиги астына кирип , сыйына арзып , бекем коргоосунда болот . Кошумча пайда : Имам Тирмизий жана Ибну Хиббаан алып келген хадисте : Азирети асыл пайгамбарыбыз саллаллооху алейхи ва саллам : « Кыямат күнү менин шапаатыма жана жеке сыйыма жалган дүйнөдө мага көбүрөөк салават айтканыңар ээ боло алат » , деп эскерет . Абу Тоолиб Маккий рохимахуллоох жана кээ бир аалымдар жогорку хадистеги « көп салават айтууну »изилдеп чыгышып ,эң аз дегенде күнүнө 300 ирет айткан жакшы деп эскеришет . Ал эми Ибну Хажар Хайтамий рохмахуллоох : Көп айтты деп - убактысынын көпчүлүк бөлүгүн салават айтып өткөргөндөргө айтылат деп баяндайт . Үстүбүздө турган күндөр жөнөкөй болбостон Кудайым даражасын көтөргөн улук күндөр . Зул хижжанын берекелүү он күндөрү . Бул убакыттарды салават айтуу менен бакытта өткөзөлү ! Жалпыңыздарга терең урматым жана жакшы изги тилектерим менен Калыс Заманбеков . 17/07/2021.