Ном тухай хѳѳрэлдѳѳн

Октябриин 26-да намда, минии бүлэдэ, онсо тэмдэгтэй үдэр болоо: «Наһанайм харгы. Хуби золни» гэжэ нэрэтэй багахан ном хэблэжэ гаргааб. Эжы, абаяа, эгэшэ дүүнэрээ, түрэл гарбалаа, үеынгѳѳ нүхэдые дурсажа бэшэһэн байнаб. үри бэе тухай бэшэгдээ юм ааб даа. Олон тоото шабинарни намда ходо дулаанаар һанагдадаг.
Баяр ёһололой үдэр Хориин аймагай номой сан соо.
Тиигээд лэ, Галина Цырендоржиевна библиотекын хүтэлбэрилэгшэ Дарима Намсараевнатай саг хэлсээд лэ, Янжима Гомбоевна, залуу хүдэлмэрилэгшэд амаралтын үдэр гэнгүй энэ ажал ябуулна ха юм. Баярые таанадтаа хүргэнэб.
«Удинская новь» сониной редакциинхидта баярые хүргэнэб: ехэ гоё ном бүтээжэрхео. Библиотекын зал соо олон зон сугларжа, аялга ташалгаар намайгаа хүндэлѳѳ, баясуулаа. Минии шабинар 1975, 1982, 1984 ондо һургуулияа дүүргэһэн. Сэсэгүүдые баряад, үнэтэй сэнтэй бэлэгүүдые бэлдээд Намдаков Булад Дондокович, София Базаровна Жигжитова, Цыпилма Дашицыреновна Намжилова, Дулма Гомбоевна Ванданова, Садуева Галина Батодоржиевна — 1975 онойхин. Баир Данзанович Дариев, Елена Анатольевна Раднаева, Эржена Доржиевна Зориктуева Николай Булатович нүхэртэеэ, Лидия Николаевна Чимитова, Жаргалма Ивановна Цыдендамбаева, Цыпилма Александровна Будаева. 1982 ондо һургуулияа дүүргэгшэд буряад зоной эдеэнэй, хүндын дээжэ болодог хони бэлэг барижа ерээ. 1984 онойхидоор һаяхана уулзаа һэмди, һургуули дүүргэһээр 35 жэлэй ой тэмдэглээ һэмди.
Арбагархан жааханууд ерэһэн аба эжын эрхүүдэйнүүд эрхим хүбүүд, басагад болоолта, алишье ажалай жолоое алдахаар бэшэ шангаар бариналта. Аргагүй найдалтай, сагаан һайхан сэдьхэлтэй эжы абанар болоолта, нютаг соогоо нэрэтэй солотойт, гүрэн түрын тэмдэгүүдтэйт. Таанадтаа доро дохижо, баярые хүргэнэб. Ажалдаа амжалтатай, ута наһанай жаргал эдлэжэ, нютагаа, зоноо үргэжэ, буян хэшэг дэлгэрүүлжэ ябахатнай болтогой!
Минии һанал бодолые хубаалдахаяа нэгэ голой уһаар ундалжа, нэгэ хүбшэ тайгын эмтэй домтой агаараар амилжа ябаһан Бүргэ нютагаархимни Клара Цыбикжаповна, Надежда Цыреновна, нэрэтэй солотой Санага нютагаймнай Баир Байкалович ута наһанай, удаан жаргалай һайхан үреэлнүүдые хэлэжэ, бэлэгүүдые барюулжа, намайгаа ехээр баярлуулаа. Баир Байкалович урдажа байһан урасхал мэтээр эжы тухай зүрхэ хүдэлгэмэ мелоди шэнхинүүлээ. Молон, Валерий Дулмаевич һанаа сэдьхэлээрээ библиотекын зал соо байгаа гэе. Молон манай Бүргын һанаха байха хүбүүдэй нэгэн юм.
Светлана Юрьевна Хориин аймагай искусствын һургуули байгуулаа. Манай үхибүүд искусство гээшэ юун бэ гэжэ тэндэ ойлгожо байна, гоё һайхан зурагуудые бүтээжэ, ямар гоёнууд хубсаһа бэлдэнэб! Миин лэ хониной нооһоор! Улзыма Ванзатовна эжынгээ бүхы наһанай хэрэг үргэлжэлүүлжэ, дээшэнь үргэжэ, Хори нютагаа Монгол, Москва, Санкт-­Петербургээр нэрлүүлжэ, суурхуулжа ябана гүб даа.
Манай захааминаархин бултадаа гүлмэр залууханууд Хори нютаг ерээд, гэр бүлын жаргал олоод, эжы абанар болоод, мэдээжэ, дээдэ шатын мэргэжэлтэд, гүрэнэй дээдэ тэмдэгүүдтэй, тоонтоеошье, нютагжаһан хонгор һайхан Хори нютагаа нэрлүүлжэ, Хори нютагаараа омогорхожо, Хори нютагтаа хүндэтэй ябанат даа. Элүүр энхэ, буян хэшэг эдлэжэ, ута наһа наһалжа, налайжа һуухатнай болтогой!
Бишье хори гаран наһатайдаа Хори нютаг ерээд, хүндэтэй багша, эжы, хүгшэн эжы болооб. Хори һайхан нютагтаа найдалтай нүхэдтэйб, тулгуурни болоһон, гэр бүлымни хамаг ушарнуудта ябалсажал, туһалжал, һанал бодолыемни хубаалсадаг шабинартайб.
үхибүүдни сэдьхэлыемни, һанаа бодолыемни, зүрхыемни ямаршье эм домһоо үлүүгээр аргалаад байдаг даа. ѳѳртѳѳ шэнги найдажа, үнэншэжэ ябадаг, үелжэ ябадаг нүхэдни намайе ехээр баярлуулаа: Нина Гончиковна, Тамара Агбановна, Тамара Михайловна, Борис Дашицыренович Намжиловтан, Валентина Хандажаповна, Анна Владимировна — түрэлни. Хориин нэгэдэхи дунда һургуулида олон жэл залуу наһаяа зорюулааб. Намайе амаршалхаяа багшанар ерээ. Баярые хүргэнэб.
Ном соо ороһон һанал бодолыемни хубаал- даат, зүрхэнэй үгэнүүдые намдаа зорюулаат, «далииемни» дээшэнь үргѳѳт, үхибүүдтэмни жаргалые хүсѳѳт. Халуун баярые хүргэнэб!
Галина Цырендоржиевнамнай Манджушри бурханай дүрэ бэлэглээ. «Ом ара база на ди!».
Баярые хүргэгшэ Долгор Хандажаповна АБИДУЕВА.