Татары Башкирии(Башкортостана)

Аллаһ Тәгалә бу кешеләрне ләгънәт кылды

١٥٠ - عن ابن عباس: أن رسول الله صلى الله عليه وسلم قال: لعنَ اللهُ مَنْ ذبَحَ لغيرِ اللهِ، لعَنَ اللهُ مَن غيَّرَ تُخُومَ الأرْضِ، لعَنَ اللهُ من كَمَه الأَعْمى عن السّبيلِ، لعَنَ اللهُ من سبَّ [وفي رواية: عقَّ] والديهِ، لعَنَ اللهُ مَنْ تولَّى غيْرَ موالِيه، [لعَنَ اللهُ مَنْ وَقَعَ على بهيمةٍ] ، لَعَنَ اللهُ من عمِلَ عَمَلَ قومِ لُوطٍ، [لعَنَ اللهُ مَنْ عَمِلَ عَمَلَ قوْمِ لوطٍ، لعَنَ اللهُ مَنْ عَمِلَ عَمَلَ قومِ لوطٍ]. («الصحيحة» ٣٤٦٢).
Ибн Гәббәстән хәбәр ителә:
"Пәйгамбәребез ﷺ әйтте: "Аллаһтан башкага багышлап корбан чалган кешене Аллаһ ләгънәт кылсын; җир чикләрен алмаштырган кешене Аллаһ ләгънәт кылсын; сукыр кешегә ялган юл күрсәткән (сукыр кешене адаштырган) кешене Аллаһ ләгънәт кылсын; әти-әнисен сүккән (тыңламаучы) кешене Аллаһ ләгънәт кылсын; кол булып, аны хуҗасы коллыктан азат итеп, иреккә җибәргәннән соң үзен башка кешегә беркеткән (башка хуҗага кайтарып калдырган) колны Аллаһ ләгънәт кылсын; хәйваннар белән якынлык кылучы кешене Аллаһ ләгънәт кылсын; Лут халкы кылган гамәлне эшләүче кешене Аллаһ ләгънәт кылсын, Лут халкы кылган гамәлне эшләүче кешене Аллаһ ләгънәт кылсын, Лут халкы кылган гамәлне эшләүче кешене Аллаһ ләгънәт кылсын"".
«Силсилә әс-Сахихә», 3462
Шәрех:
1. Аллаһтан башкага багышлап корбан чалган кеше ширк кыла, чөнки корбан чалу ул - гыйбадәт. Һәм кем дә кем нинди дә булса гыйбадәтне башка нәрсәгә, башка кешегә тапшыра икән, мондый кеше ширк кылды, мәңгелек Утка кертүче гөнаһ ясады. Бүген кешеләр Болгарга, әллә кайларга барып әүлияләргә сарыклар, корбан чалып кайталар. Бу - ширк. Аллаһ мондый кешене ләгънәт кылды. Ләгънәт кылу дигән сүз ул – Аллаһның рәхмәтеннән ерагаю. Ягъни "ләгънәт кылсын" дигәч Аллаһның рәхмәтеннән мәхрүм булсын дигәнне аңлата. Шуңа күрә корбанны бары тик Аллаһ өчен генә чалырга ярый.
2. Бүген күршең белән бакча чиген я башка чикләрне үзгәртәсең икән бер сөям хәтле генә булса да, димәк сиңа Аллаһның ләгънәте киләчәк. Икенче бер хәдистә Пәйгамбәребез ﷺ әйтә: "Кем бу дөньяда бер сөям хәтле генә җир чиген үзгәртә икән, Кыямәт көнендә аңа җиде кат җирне муенына элеп куячаклар".
3. Бүген кешеләрне туры юлдан (гыйлем, дин буенча) адаштыручылар шушы хәдискә эләгәләр.
4. Әти-әниеңә нинди генә начар сүз, начарлык китерә торган сүз әйтәсең икән, димәк син Аллаһның ләгънәтенә эләгәсең. Монда әти-әнисен тыңламаучы кеше дә керә.
5. Әгәр колны хуҗасы азат итсә дә, бу хаҗасы аның мәңгелек варисы булып кала. Ягъни кол үлсә дә, аның байлыгы хуҗасына кала, хәтта ул азат ителгән булса да. Шуңа күрә әгәр ул үзен бүтән кешегә беркетә икән, мондый кешене ләгънәт кылсын диде Пәйгамбәребез ﷺ.
6. Лут ﷺ кавемендә ирләр ирләр белән якынлык кылдылар. Бүгенге көндә бу хәл дөнья буйлап тарала, хәтта безнең якларга да килә, Аллаһ сакласын. Бу - бик пычрак, куркыныч гамәл. Шушы гамәлне кылган өчен Аллаһ Лут халкын үтерде. Ибн Кәсир Коръән тәфсирендә шундый сүзләр китерә: Җәбраил фәрештә Аллаһның әмере белән шушы халыкны юк итәр өчен килгәч, бер канаты белән алар торган шәһәрне, шушы җирне бөтен агачлары, йортлары, этләре, хайваннары, үзләре белән бергә җиденче кат күккә хәтле күтәрә. Хәтта әтәчләрнең, этләрнең тавышларын шушы җиденче катта булган Аллаһның мәхлуклары, ягъни фәрештәләр ишетәләр. Аннан соң шушы биеклектән Җәбраил галәйһиссәләм шушы халыкны әйләндереп җиргә бәрә. Җиргә бәргәннән соң өсләренә Җәһәннәмнән булган ташлар төшә. Шуңа күрә ир кеше белән ир кеше якынлык кылу - бик куркыныч гамәл, шуңа күрә Пәйгамбәр ﷺ аны 3 мәртәбә кабатлаган, мондый гамәлдән ерак булырга кирәк. Һәм инде ирләрнең хатыннары белән арткы яктан якынлык кылулары да шулай ук бу хәдискә керә.
Аллаһ Тәгалә безне шушы Аллаһ ләгънәт кылган гөнаһлардан сакласын һәм безне барыбызны да туры юлдан алып барсын.

Җомга көнне кеше башыннан йөрү

عن أبي الدرداء، قال: قال رسول الله ﷺ: «لا تأكل متكئاً، ولا على غربال، ولا تتخذنَّ مِنَ المسجدِ مُصلى لا تصلي إلا فيه، ولا تخط رقاب الناس يوم الجمعة؛ فيجعلك الله لهم جسراً يوم القيامة». («الصحيحة» ٣١٢٢).
Әбү Дәрда хәбәр итте: "Аллаһның илчесе ﷺ әйтте: «Терәлгән килеш ашамагыз, шулай ук ботыңа терәлеп ашама, мәчетләрдә үзеңә намаз укый торган аерым урын сайлап алма, җомга көнне кешеләрнең баш-муеннарыннан атлап йөрмә, әгәр шулай эшли калсаң, Кыямәт көнендә Аллаһ шул кешеләр өчен синнән күпер ясар»".
Силсилә әс-Сахихә, 3122.
Мәгънәсе:
1. Мәчеттә үзеңә аерым урын алма, ягъни шул урында гына намаз укырга, башка кешеләргә монда басырга тыерга, үзең өеңә кайтып киткәндә шушы урынга башка кешеләр утырмасын өчен берәр нәрсә куеп калдырырга тыелган, алай эшләргә ярамый.
2. Җомга көнне кешеләр соңга калып киләләр, мәчетнең инде яртысы тулган, һәм шул вакытта кешеләрнең өсләреннән аяклары белән, иңбашларына басып атлый-атлый түргә үтәләр. Бу дөрес түгел. Әгәр шулай эшли икән, Аллаһ Тәгалә мондый кешедән Кыямәт көнендә күпер ясаячак һәм бу кешеләр аның өстеннән йөриячәкләр. Шуңа күрә әгәр мәчеткә җомгага килеп беренче утырасың килә икән, иртәрәк кил, ә инде соңга калып килдең икән - буш урынга утыр.

Сәламәт калеб – Аллаһ Тәгаләне һәм Ул ярата торган нәрсәләрне ярата

Аллаһ Тәгалә Ислам динен, иманны ярата, ул да шуны ярата! Беркайчан да гөнаһ кылмый торган, гел Аллаһка итәгатьтә, гыйбадәттә булучы фәрештәләрен ярата һәм
хөрмәтли, — ул да аларны ярата. Раббыбыз Үзенең, кешеләр арасында иң хәерле булган Пәйгамбәрләрен ярата, сәламәт калеб тә аларны ярата вә хөрмәтли. Пәйгамбәрләр арасындагы иң соңгысы, Кыямәткәчә барлык кешеләргә һәм җеннәргә рәхмәт булып җибәрелгән сөекле Пәйгамбәребез Мөхәммәдне ﷺ ярата, — калебе сәламәт булган мөэмин кеше дә аны ярата һәм аңа итәгать итә. Аллаһ Тәгалә мөхәҗирләрне, ансарларны һәм барлык сәхабәләрне, ислам галимнәрен, бер Аллаһка гына гыйбадәт кылучы, лә иләһә иллә-Ллаһ буенча яшәүче тәүхид, сөннәт әһелләрен, Аллаһ юлында малларын да, җаннарын да кызанмый торган Үзенең колларын ярата һәм калебе сәламәт булган мөэмин кешесе дә аларны ярата. ӘлхәмдүлиЛләһ! Ә имансызларны, Аллаһка тиңдәш кылучыларны, монафыйкларны, бидгать гамәл кылып, динне үзгәртеп, бозып йөрүчеләрне, киресенчә — Аллаһ ризалыгы өчен сөйми.
Аллаһ Тәгалә яраткан, хөрмәт иткән урыннар да бар — Мәккә, Мәдинә шәһәрләре, аларның мәчетләре, Кәгъбәтуллаһ, хәрам җирлеге. Калебе чиста, сәламәт булган кеше дә ул урыннарны ярата, аларны сагына, кабат-кабат анда барырга тели. Җир йөзендә Аллаһның иң хөрмәтле, иң сөекле, иң чиста, иң пөхтә булган урыннары — мәчетләр! Аллаһ аларны бәйтуллаһ диеп, Үзенең исеменә кушып атаган. Сәламәт калеб — Аллаһның мәчетләренә бәйләнгән калеб. Ул аларны ярата, чистарта, кайгырта, намазларга вә дини дәресләргә йөри һәм үзенең яшәгән йөртыннан да якынрак күрә.
Аллаһ Тәгаләнең хөрмәтләгән, яраткан нәрсәләр арасында төрле заман-вакытлар да бар. Шулар арасында — Рамазан ае, Рамазан аеның соңгы 10 төне, Мөхәррәм аеның беренче 10 көне, Кадер кичәсе, Җомга көне, Ураза гаете белән Корбан гаете һәм башкалар. Калебе сәламәт булган мөэмин кешесе, шулай ук, ул вакытларны сөя, хөрмәтли һәм кадерләп көтеп ала. Әнәстән (Аллаһ аннан разый булсын) килә: «Аллаһның илчесе ﷺ: «Кеше үзендә өч хис тапса, иманның тәмен тоячак: Аллаһны һәм Аның рәсүлен бөтен нәрсәдән дә күбрәк яратса, бүтән кешене Аллаһ ризалыгы өчен генә яратса һәм көферлеккә кире кайтуны утка ташлануын теләмәгән кебек яратмаса».¹
Имам ән-Нәвави сәламәт калебне тәсфирләп болай дигән: «Калеб изге халәткә ирешсен өчен аны нәфрәт, ачу, көнчелек, комсызлык, усаллык, тәкәбберлек, башкаларны мыскыллау, шөһрәткә омтылу, хәйләкәрлек, комсызлык һәм тәкъдиргә риза булмау кебек яшерен авырулардан азат итәргә кирәк! Азат итү генә түгел, коткарырга кирәк!..»
____________
¹ Әл-Бохари, 1/56-58, 68 һәм Мөслим, 43.
Әбү Муса Сәйфеддин, "Күңелләрне йомшарту китабы"

Ширек нәрсәдә чагыла соң?

Кече ширеккә аңлатма биргәндә без «Аллаһ сәбәп итеп кылмаган нәрсәләрне сәбәп итеп алу» дип карап киткән идек. Берәү муенына нидер тагып, яисә кулына нәрсәдер бәйләп куеп: «Менә бу нәрсәләр мине күз
тиюдән сакларга сәбәп булып торалар. Шуның сәбәпле миңа күз тимәячәк!» — дип әйтә калса, ул кеше кече ширек кылган була.
Менә хәзер, әйтәсе килгән фикеребезне йомгаклап, югарыда карап киткән кагыйдәләр нигезендә, «күз тиюдән сакланыр өчен» дип тагылган амулет мисалында, әлеге гамәлнең кече ширек икәнен аңлатып китәрбез.
Фәлән кеше муенына амулет элгән һәм шуның сәбәпле күз тиюдән сакланам, дип уйлый. Әлеге гамәлнең дөресме-юкмы икәнен белү безнең өчен хәзер бернинди авырлык та тудырмый. Шулай бит инде? Моның өчен түбәндәгечә эш башкарабыз:
► Беренчедән, шулай дип ышануыңа шәригатебездән дөрес булган дәлил бармы? Юк.
► Икенчедән, синең бу гамәлеңә көнкүрешебездән берәр төрле аңлатма биреп буламы? Сәбәп белән нәтиҗә арасында үзара аңлаешлы, фәнни яктан аңлатып була торган бәйләнеш бармы? Юк.
Димәк, синең бу гамәлең ялган сәбәп булып чутлана һәм син Аллаһка кече ширек кылган буласың.
Ширек кылу нидә чагыла соң? «Барлыкка китерү, халык кылу» мәсьәләсендә, ягъни Тәүхид әр-Рубубиййәһтә Аллаһка тиңдәшлек кылуда! Һәммәбез дә белә, халык кылучы, юктан бар итүче — ул Аллаһ кына. Сәбәпне дә, нәтиҗәне дә Аллаһ барлыкка китерә. Әмма югарыда карап киткән мисалны (амулет — күз тиюдән саклауга сәбәп) Аллаһ Тәгалә сәбәп буларак барлыкка китермәде, чөнки шәригатебездә дә, көнкүрешебездә дә моңа аңлатма юк. Димәк, Аллаһ моны сәбәп итеп бар кылмады, ә син «сәбәп», дип атыйсың, шулай итеп бу сәбәпне син барлыкка китерәсең, «халык кыласың» булып чыга. Менә шушы «сәбәп кылу» мәсьәләсендә Аллаһка карата ширек кылына да инде!
Әбү Муса Сәйфеддин,"ЧАТЛЫ БАГАНА" китабы.