Сўнгги сўз ва сўнгги нафас .

. . ! ! !
Шу холатни хеч ўйлаймизми? Билмаймиз... билолмаймиз... Хозиргина тилимиздан учган сўз сўнггиси бўлиши эхтимол... Эндиги чиқарган нафасимиз охиргисидир балки? Киши бу оламни тарк этгач, яқинлари унинг сўнгги харакатларини, сўнгги гапларини эслашади ва ундан хикмат излашади. Ажойиб болалар ёзувчиси, кўп йиллик қадрдон акамиз Сафар Барноевнинг касал бўлиб ётганларини эслолмайман. Шу киши 63 ёшларида кеннойимизга «Малика, ўлиш шунақа осонми?» дебдилару, жон таслим қилибдилар. Бу хол каминани кўп ўйга солди. Улуғларнинг сўнгги сўзларини эсладим: англиялик шоир лорд Байрон ўлими олдидан қоғоз ва қалам сўраган экан. Аммо қалам тутишга холи бўлмай: «Тамом, энди жуда кеч», деб кўз юмган экан. Суқрот хаким «Ўлим рухнинг танадан ажралиши ва танадан айри холда яшаши, мавжуд бўлишидир, шундай экан, мен ўлимдан қўрқмайман», - деб яшаган. Сўнгги сўзи эса... «Аскулепиосга бир хўрознинг бахосича қарзимиз бор эди, эсингдан чиқмасин, Критон», - деб васият қилган экан. Салмон Форсийнинг сўнгги сўзлари насихат тарзида бўлган экан: «Нимаики қилсанг, Аллох розилиги учун қил ва буни сира унутма!» Сўфий Халложни «анал хақ!» ақидаси учун қийнаб ўлдирганлар. Олдин панжалари, қўллари кесилган, кўзлари ўйилган. Навбат тилни кесишга келганида деган эканларки: «Аллохим, сенинг розилигинг учун менга ушбу уқубатларни раво кўрганлардан рахматингни аяма. Сенинг мухаббатингга эришиш йўлида мени қўлларимдан, оёқларимдан жудо қилган бу қулларингни авф эт. Кечир, Аллохим, уларни кечир! Мухаббатинг хурмати кечир» . . . ! ! ! Тохир Малик