XazonRezgi (Official Channel): ТОКИ_ҲАЁТ_ЭКАНМАН... 17- қисм Орадаги бир ойга яқин вақт шу тариқа ўтди. Бу муддатда Камроннинг ўзига у қадар яқин олмаган ҳолда эҳтиёткорона ва ҳурмат билан қилган муомаласи Тахминанинг ички дунёсини бутунлай ўзгартириб юборишга эришган эди. Ахир ёшлигидан то шу давргача меҳнатдан боши чиқмаган қиз бирданига умрида кўрмагани тинч , осуда , фаровон, тўкин ҳаётга тушиб қолса , меҳр , эҳтиром , ҳурмат каби ҳассос туйғулар билан сийланса ... Ўзгармасинми ...?! Жуда ўзгаради- да ... Камрон берилган муҳлат қанчалик тез тугаб , Фотимасининг ўз бағрига шунчалик тезроқ қайтишини қанчалик иштиёқ билан кутаётган бўлса , Тахмина ҳам Камроннинг Фотимага олиб борувчи ана ўша вақтнинг тўхтаб қолишини чин дилидан жуда истар эди. Тахмина бир ой давомида уч хонали квартирада маликалардек яшади. Айтгани айтган , дегани деган бўлди . Оғзидан чиққани шу заҳоти муҳайё бўлди. Янги турмуши ўзига шу даражада ёқиб қолди- ки , ўзини аллаким ҳисоблаб гоҳида икки киши учун ҳам овқат тайёрлашга эринди. У квартирадан чиқишга ҳам малолланиб қўлига телефон олганча , ўтирган ўрнида таом етказиб бериш ҳизматидан фойдаланишни ҳўпам ўзлаштирди. "Яна қачон бундай шоҳона яшар эдим ? - дея ўйлар эди Тахмина сўнгги пайтларда тез - тез ҳудбинлиги тутиб,- Камрон ака ҳозирча иши тушганидан менга яхши муомала қилиб турибди. Эртага иши битиб , эшаги лойдан ўтсин- чи , кўрамиз ўшанда мени танирмикан ?! Эҳ, шу ҳомиладор бўлиш масаласини бироз кечиктириб турсаммикан ? Баҳонада бир , икки ой мазза қилиб яшаб олганим қоларди, - Таҳмина гоҳида шундай қарорга келган бўларди-ю , аммо тезда фикридан қайтарди ,- вақтида ҳомиладор бўлмасам булар мени бошига тўқмоқ қилиб сақлаб ўтиришмаса керак ... Мевали дарахт меваси учун эъзозланади , манзарали дарахт эса кўзларга бахш этган ороми учун. Ҳеч замонда бу иккисининг ўрни алмашган эмас ... Камрон йигитлар билан тушликка отланишган ҳам эди- ки , бўлинмага навбатдаги ёнғин ҳақидаги чақириқ келиб тушди. Ўт ўчириш бўлинмаси етиб борганда хонадон ошхонаси ва унга туташ хона гуриллаб ёнар эди. Уйга ўт кетганидан махалла аҳли вақтида хабардор бўлиб қолишибди. Бўлинмага хабар бериб , то улар етиб келгунига қадар уйда бўлган кекса буви билан икки нафар қизчани хавфсиз жойга олиб чиқиб ўзлари баҳоли қудрат ўтни ўчириш пайидан бўлишаётган экан. Йигитлар дарҳол ишга киришдилар . Кўп ўтмай тилсиз ёв бартараф этилди. Бу орада хонадон соҳибаси ўттиз ёшлардаги жувон шошилиб уйига қайтиб қолди. Жувон ҳозиргина ёнғин бостирилган хоналарга яқинлашиб , ичкарига назар ташлади-ю , оппоқ юзлари қоп- қорайиб унниқиб кетди. У йиғилган одамларга ортиқча эътибор бермай , титраб - қақшаганча оломон орасидан кимнидир ахтаришга тушди. Жувон қўрққанидан ранги кесак бўлиб кетган мунчоқдек набирасининг овутиш билан овора қайнонасининг тепасига келиб кўзларидан олов сачраганча сўради: - Нима бўлди ? Бир пасда нима балони бошладинглар ? - Бўлди , бўлди , жоним ...- кампир набирасини овутар экан , келинининг юзига қарамай жавоб қайтарди ,- менгина ўлай . Қизлар ўйнаб ўтиришибди деб бепарво бўлиб мизғиб қолибман. Одина ўзича "Мен чой қўйишни биламан" деб газни ёқибди. Қоғоздан тутантириқ қилган экан олов лоп этиб ошхона пардасига туташиб кетибди. Ўзи қўрқиб кетиб ўт кетган пардани ўчирмоқчи ҳам бўлибди. То мен воқеадан хабардор бўлиб ҳай- ҳайлагунимча шу аҳвол... - Одина ?! - жувон қайнонасининг қўлидан титраб -қақшаб турган қизчани юлқиб олиб жон ҳолатда дўппослай кетди ,- жонинг чиқсин сени ! Шунча доллар куйиб кул бўлибди- ку , жувонмарг ! Шу пуллар йўқ бўлгунча сен гирифтор бўлсанг бўлмасмиди , ҳайвон... Камрон қайнона-келинга яқин жойда турган эди. Жувоннинг "Одина!" деган чинқириғи унинг қулоғига "Фотима" бўлиб эшитилди. Камрон кўзлари мунчоқдек , сочлари жингалак , тиқмачоқдек лўппи , оппоққина қизалоқни исмини Фотима деб нотўғри эшитганда бўлари бўлиб бўлганди , унинг шафқатсизларча калтакланаётганини кўриб ўзини тутиб тура олмади : - Тегма болага ! - арслондек ўкириб жувонга ташланди Камрон . У аёлнинг қўлидан қизалоқни тортиб олиб ўзини итариб юборди,- одамлар болага зор, сен уни хор қиласан ! Ҳеч бўлмаса худодан қўрқ , алвасти ! Ҳе пул жонингни олсин сенинг! Камрон йиғлашга ҳам мадори қолмай, қучоғида бемажол инграб ётган қизалоқни бағрига босиб кўча тарафга юра бошлади : - Йиғлама қизим , ҳозир сенга ўзим шокалад олиб бераман. Оҳ-оҳ сув ҳам . Камрон итариб юборганда ҳовлининг асфальтланган жойига тиззалаб тушган аёл Камроннинг ортидан ер муштлаб қарғаб қолди : - Ҳее бўйинг лаҳадда чирисин сенинг ! Ҳали шошмай тур мени йиқитганинг ва ҳақорат қилганинг учун жавоб берасан! Устингдан юқори ташкилотларга арз қиламан. Қараб тур ! Судга бериб жарақ - жарақ пул ундираман! Камрон жувоннинг гапларига "Кимга гапираяпсан ўзи ?" дегандек парво қилмай, ортига қарамай ҳовлини тарк этди. Жувон вой- войлаб кўйлагининг этагини тиззасигача аста кўтарди . Лозим устидан бўлса-да, жувоннинг шилинган тиззаларидан тирқираб қон сизиб чиқарди : - Илоё мени итарган қўлларинг акашак бўлсин. Илоё... - Синглим ,- деди бамайлихотир ҳовлидаги шлангни йиғиштирар экан Тўра ака исмли ўт ўчирувчи , - сиз бор кучингизни қарғишга сарфламасдан бошлиғимизнинг устидан ариза беринг. Темирни қизиғида босинг. Шунда бизга ҳам осон бўлади. Тўра ака ўзига тушунмай бўзрайиб тикилиб қолган жувонга батафсил тушунча беришга ҳаракат қилди: - Шунда биз ҳам судга қизчангизни аёвсиз дўппослаганингиз учун сизга қарши ариза топширишимиз мумкин бўлади. Суд сизни оналик ҳуқуқидан маҳрум қилса , ўшанда долларингиздан ҳавотир олмай енгил нафас олаверасиз. Жувон Тўра аканинг сўзларига бир мунча муддат тушунмай бақрайиб қараб турди- да , сўнгра ранги ўчиб ташқарига отилди. У кўча юзидаги ўриндиқда қизчани ширинлик ва шарбат билан сийлаётган Камронга яқинлашди : - Сиз ... Сиз - деди у Камронга изтироб билан тикилиб овози титраганча ,- сиз аёл кўнгли нималигини биласизми ? Бир аёл ўз жуфти учун бори - йўғидан кечиб , жонини нисор қилса- ю , раҳматига жаноби эркак кўнглини бошқа аёл қучоғида чоғласа ? Сиз аёл эмассиз ... Шу сабаб ҳозирги гапларим сизни ҳаяжонга солмаслиги аниқ. Қаршингизда турган аёл бир неча йиллик садоқати эвазига эри томонидан кундош билан сийланган аёл. Сиз мени алвасти дедингиз а ? Менинг исмим Паризод эди... Аммо буни ўзим ҳам унутиб қўйгандим. Алвасти деганингиздан сўнг исмим ёдимга тушди. Эрим ҳам мени алвасти деган эди. Ўша "Ҳақиқий бахти"ни топиб уйдан чиқиб кетаётган куни. Эрим уй-жойимизни пинхона сотиб юборгани ўша аёлникига кетаётган куни маълум бўлган эди. У ўша куни ўз онасидан ҳам тониб кетди. Қайнонам , мен , икки қизим бутунлай кўчада қолиб кетдик. Бу уй тоғамнинг ўғлини уйи. У ҳозир чет элда бўлгани учун унда вақтинчалик яшаб тургандик. Мен эса вақти келиб бирор бошпана олармиканман, ўз бошимга бир ватаним бўлармикан деб кеча-ю кундуз тиним билмай икки сменлаб ишлаётувдим. Мен ... Мен эримга кўрсатиб қўймоқчи эдим. Усиз хор бўлиб кетмаганимни , аёл бошим билан ҳам бу ҳаётда яшаб қола олишимни ... Мени ота- онамдан қолган ёлғиз укам бор. Уям жўжабирдек жон. Шу сабаб ўзим камлик қилганимдек қайнонамни ҳам уникига етаклаб бормай дегандим. Мен ... Мен бир йилда беш минг доллар йиққандим. Ўзим емай , ўзим ичмай... Аммо қизларим ва ойимни овқатдан қисганим йўқ эди ... Бу гапларни сизга нима учун гапиряпман биласизми ? Эркак бўлганингиз учун ?! Яна ... Яна фарзандимни ўртага қўшиб менга маломат қилманг ! Менинг бошимга ёққан қордан сиз бехабарсиз ! Уни кураш ҳам аёл бошим билан ўзимга тан ! Шундай экан йўлингиздан қолманг ! Айтганча , ўша йўлингизда бир аёлга қониқмай ўз жуфтлик вазифасини унутиб , иккинчисини этагидан ушлаб кетадиган эримга ўхшаган "эркак"ларни учратсангиз айтиб қўйинг-ки, баъзан бизнинг фақат номимиз ожиза ! Яна шуни етказинг-ки , биз аёллар сиз эркаклар учун Аллоҳнинг омонатимиз. Омонатга ҳиёнат эса икки дунёда ҳам кечирилмас гуноҳдир... - Ая , йиламанг ,-Одина қўлчаларини онаси томонга узатди,- ман сижя пичинни беяман... Жувон қўлини қизчасини аста бағрига босди : - Йиғламаяпман болам ... Мени кечир қизим. Нотавон онангни кечир ... У қизчасини кўтариб битта - битта қадам босганча нари кета бошлади... Камроннинг унга жавобан бир оғиз сўз айтишга мажоли қолмаган эди. Шу топда у дунёда ўзидан-да кўпроқ нафратланадиган одами йўқлиги фаҳмлаб улгурганди. Унинг қулоқлари остида Паризоднинг "Биз аёллар сиз эркаклар учун Аллоҳнинг омонатимиз. Омонатга ҳиёнат эса икки дунёда ҳам кечирилмас гуноҳдир..." деган сўзлари қайта - қайта жаранг сочар эди... - Фотима... Бери кел қизим . Ҳуфтон намозини ўқиб бўлган Каромат амма Фотимани ёнига чорлади. - Лаббай аммажон ... - Кел , ёнимга ўтир,- Каромат амма Фотима унинг ёнига жойлашиб ўтириб олгач, чуқур хўрсиниб гап бошлади ,- қизим. Ҳозир мен айтадиган гаплардан ҳоҳ хафа бўл, ҳоҳла ҳурсанд. Хуллас гапнинг индаллоси шу. Сен эрингга "Бир ярим ойда қайтаман" деб хат қолдириб келган экансан. Мана келганингга ҳам бир ой вақт тўлиб қолди. Аввало амманг сифатида айтадиган бўлсам, бир ярим ой эмас , бир ярим йил бағримда юрсанг ҳам бундан фақат ҳурсанд бўламан. Ёнимда борлигинг қалбимга ҳузур, кўзларимга нур, танамга қувват, жонимга роҳат ... Бироқ барча нарсани ақл торозусида ўлчайдиган, кўпни кўрган кекса аёл сифатида шуни айтаман-ки, энди уйингга қайтмасанг бўлмайди. Болам, оналаримиз бизга "Эр-у хотиннинг ўрни уч кундан ортиқ бўш қолиши керакмас" дея тарбия беришганди, йўқса ўша иссиқ ўрин совуб , уларнинг орасига "кўнгил қолиши" деган совуқчилик тушар экан. Энди сенинг мисолингга келсак , ўша аёлга етарлича муддат бердинг деб ўйлайман. Мен "Агар эринг ва ўша аёлнинг пешонасига биргаликда фарзанд кўриш ёзилган бўлса , бунга уч кун ҳам етарли бўлади" деб ўйлайман, йўқ эрса бир эмас , бир неча ой кутсанг ҳам бари бефойда. Икки орада сенинг юрагингни эзилгани , рашк азобида куйиб қовжирагани қолади. Яна бир гап ... "Эркак киши кўзи билан севади" деган гап бор. Бу дегани сен эрингни ўйлаб бу ерда кун санасанг , эринг у ёқда ўзи билиб-билмай , истаб-истамай ўзга аёлнинг асирига айланиши ҳеч гапмас. Билиб қўй ... Ҳамма аёл ҳам сенга ўхшаган покиза сийратли эмас. Дунёда шундай аёллар бор-ки , макри қирқ туядан ортиб , яна қирқ бияни излаб кетиши мумкин. Керак бўлса макри билан шайтонга дарс берадиган аёллари ҳам бор десам ишонавер . Ҳа майли бу масалада чуқурлашмай қўяқолай. Шунчаки ҳаммани ўзинг каби билиб ишониб кетаверма , бунчалик содда бўлма деб гапирдим-да бу сўзларни . Фотима ... Кези келганда юрагимни эзган ўз ҳақиқатимни айтиб олсам дегандим. Тўғри бўлар иш бўлиб , бўёғи синиб бўлган . Аммо шундай бўлсаям гап сен ҳақингда кетганда гапириб олмасам бўлмайди. Тўғрисини айтайми ? Тўғриси шу-ки , сен эрингга ўзинг иккинчи хотин олиб бериб катта хато қилгансан. Никоҳ деганлари бугун ўқилиб , эртага бузилиши кутилинадиган битим эмас. Гарчи ундан энг гўзал умид кўзланса ҳам. Бу масалада ҳазиллашиб бўлмайди. Тўғри қадимгилар "Чўкаётган одам ҳасга ҳам ёпишади" дейишади. Қўрқаманки , ўз бошингга сотиб олган ғавғоинг , кундошлик балоси сен учун ўша ҳас каби бесамар кетмасин. Илойим ўша ҳасдан умидвор бўлганча , ҳаёт деб аталмиш гирдоб домига ғарқ бўлмагин. Ҳозирги гапларим қалбингни тилкаяпти , биламан. Аммо аччиқ бўлса ҳам уларни ҳазм қилдиришга мажбурман. Сен эрта билан уйингга қайтишинг керак. Агар ўша аёл шу чоққача ҳомиладор бўлган бўлса , майли . Бу сен кутган натижа. У билан келишгандек йўлингда давом этасан. Агар шунча муддатда ҳомиладор бўлмаган бўлса , унда жон қизим , иссиқ уйингни совутма. Ўша аёлни жавобини бериб юбор. Эрингни бола асраб олиш ҳақидаги таклифига кўн ва ҳаётингни бошидан бошла. Ўзи аввал бошдан энг тўғри бўлган йўл шу эди. Каромат амма чуқур тин олди : - Мен айтаримни айтдим . Биласанми бу гапларни айтиш менга қанчалик оғир бўлганини. Аммо келган кунингдан бошлаб ўзимни раҳматлик онангни ўрнига қўйиб кўряпман ва сенинг дарднинг мени бир тутам қилиб юборяпти. Яна сен- жигарпорамни кундан кунга тугаб бораяпганингни кўриб қийналиб кетяпман. Ёруғ дунёда жуфтинг тирик бўла туриб , уни севиб , у томондан севилсанг-у , ўзингни усизликка маҳкум қилсанг ?! Бундан ортиқ бедодлик борми ? Жуфтингни Аллоҳ даргоҳига қайтмас қилиб чақирган бўлса эди-ки , унинг қадарига кўниб яшасанг. Аммо бир-бирингдан тирик жудо бўлиб , ҳар иккинг икки чеккада бўз тўрғайдек нола чекиб яшашларинг Худогаям хуш келмаслиги аниқ. Сенга бошқа гапим йўқ. - Аммажон...- деди Фотима ўрилган сочининг учини бармоғига ўрар экан,- раҳмат сизга ... Кўзимни очдингиз... Мен эртагаёқ йўлга тушаман... Эртагаёқ... Фотима тоққа келгандан буён қўл телефонини ўчириб қўйган , уйидагилари билан эса аммасининг рақами орқали қўнғироқлашаётган эди. У кийим жавонининг бир бурчагида жойлаб қўйган сумкасидан қўл телефонини чиқарар экан , Каромат аммасига изоҳ берган бўлди : -Камрон акамга қўнғироқ қилиб эртага қайтишимни айтаман... Каромат амма кўнгли тўлганча бош силкиди : - Аллоҳ мушкулингни осон қилсин , болам... Фотима ташқарига ўқдек отилди . Фотима ташқарига чиқаётган чоғ унинг чўнтагидан бир парча қоғоз тушиб қолди . Каромат амма қоғозни кафти билан текислаб ундаги сўзларни шивирлаб ўқийди : Армонларим тош териб, вафо қасрини йўнар, Гарчи қалбим кул босган , бир бурчида гул унар , Қабоғим қадоғига нозик капалак қўнар, Қуёш ҳукмига таслим, қаҳратондан муз терма, Қалбимга озор сепар, тузларга мени берма ... Каромат амманинг кўзлари ёшланди... Фотима ташқарига чиқиб титраган қўллари билан таниш рақамни топиб чақирув тугмасини босар экан , Камрон акаси гўё ёнида тургандек юраги гурс - гурс урар эди : - Алло, Камрон ака... Бу мен ... Фотима... Кейинги кунларда Таҳминанинг кўнгли тез-тез ўз- ўзидан ҳижил бўлиб кетаверадиган бўлиб қолган эди. Хатто Камрон ишда бўлган вақтида ўз хуш кўрадиган севимли машғулоти - музқаймоғ-у ичимлик , турли сархил егуликлар билан дастурхонни тўлдириб оёғини чалиштириб олганча кун бўйи ****- ичиб сериал томоша қилиш ҳам кўнглига теккандек эди. Унинг кўнгли алланимани қаттиқ тусар , бироқ ўша алланиманинг нима эканлигини била олмай ҳуноби тобора ошар эди. Тахмина ўзини қийнаётган туйғунинг нима эканлигини фаҳмига уч кунларда етди : - У Камронни Фотимадан қаттиқ қизғанаётган экан ! Гарчи Камрон Таҳминанинг ёнида Фотима ҳақида бир оғиз сўз айтмаса ҳам , у деярли бир ойдан буён бирга яшаётган "эри" кундошини кун эмас , соат санаб интизор кутаётганини аёллик қалби билан теран ҳис қилар эди. " Бор- ей , менга нима ? Тезроқ туғиб берсам буларнинг ҳар иккисини ҳаётимдан чиқариб ташлаб мазза қилиб яшайман" дея овунаётган Таҳмина бу сўзлар фақатгина ўз- ўзини алдаш учун айтилаётгани ўзи ҳам яхши биларди . Сабаби ... Сабаби бу инсонлар энди минг истаса ҳам нафақат ҳаётидан , балки хаёлидан ҳам чиқиши жуда мушкул иш эди ... Айниқса Камрон ака... Бир оғиз ширин сўз , бир чимдим меҳрга ташна бўлиб улғайган Тахмина ўзини аёллик бахти билан сийлаган Камронни бутун вужуди билан севиб қолган эди... Тахмина Камронни ишга кузатиб қўйгач тушгача ётоқхонада ётди. Аммо кўзларига уйқу келмай , ланжлиги бадтар ошди. Бўлажак тақдири ҳақида ўйлаб- ўйлаб мияси чарчаб кетган Тахмина у, бу нарса **** ўзини чалғитмоқчи бўлди . У ошхонага чиққанида ҳеч нарса егиси келмаетганини , овқат ҳақида ўйласа кўнгли беҳузур бўлиб кетаётгани фаҳмлаб , пешонаси янада тиришди. Таҳмина чуқур хўрсиниб музлаткич эшигини очди. Унинг ичида турган хилма- хил махсулотлар ичида бир литрлик банкадаги бедана тухумидек майда памидор аралаш тузланган жимчилоқ катталигидаги черри бодрингларга кўзи тушиб оғзининг суви келди. У банканинг қўлига олиб қопқоғини очди- ю , турган жойида тузламанинг нордон сувини симириб ича бошлади. Бир пиёлача ичилган тузлама сувидан кўнгли очилган Тахмина банкага термулган кўйи ўйлана бошлади : - Бу тузламани кеча сотиб олмагандим ?! Бир ярим кунда сувини ичиб тугатибман- ку. Дониям кўп қолмабди. Камрон ака кеча дамланган ош билан ҳам тузламадан кўп егани йўқ, уни асосан ўзим тинчитдим. Куйган кўнглимни яхшилаб маринадлаяпти шекилли бу намокобнинг ўткир сиркали суви. Супермаркетга бориб бир йўла икки банка об кеб қўйсам бўларкан. Ҳозир кийимимни алиштираман- у ... Тахмина ётоқхонага илдам йўл олди. У ичкарига қадам қўяр экан кўнглига келган бир ўй бутун хаёлларини остин - устун қилиб юборди. У камод тортмасини очиб чаққонлик билан ялтироқ қадоқдаги алланимани олди... Орадан ўн беш дақиқа ўтмай Таҳмина ваннахона полида ҳуши бошидан учган ҳолда қўлидаги таёқчага анграйганча тикилиб ўтирар эди. Таҳминанинг бу аҳволга солган нарса ҳомиладорликни аниқлаб берадиган тест бўлиб , унинг кўрсаткичи аёлга "ҳомиладор" деган муҳрни уриб берган эди... Тахминанинг бир кулгиси , бир йиғлагиси келар эди. У анча вақтгача ҳисларига асир бўлиб ўтирди. Бир кўнгли "Камронга қўнғироқ қилиб суюнчи ол" деса , иккинчиси "Кечгача сабр қил. У ишдан қайтгач хушхабарни кўзингни кўзига тиккан ҳолда айт ва бундан ўзинг ҳам бир олам завқ олиб осмонларда учгин" дерди. Тахмина ва ниҳоят бир қарорга келди. Аввал гўзаллик салонига боради . Сочларини чиройли турмаклатади. Юзларини пардоз қилдиради . Сўнгра супермаркетга кириб анвойи егуликлар олади. Ресторанга энг зўр таомни буюртиради. Дастурхон тузайди ва кечки таом вақтида хушхабарни Камронга айтади... Ана ўшанда ... Таҳмина ширин энтикди. У илдам ўрнидан турди-ю, кийимларини алиштириш учун ётоқхонага кирди: "Бу ишларга Камрон ака келгунларича улгуришим керак !" Таҳмина остона ҳатлаб кўчага йўл олганда ўзини елкаларига қанот битган фариштадек енгил ҳис қилар эди... Камрон кундуз куни ёнғир содир бўлган хонадон бекасининг аччиқ таъна-дашномлари сабаб кун бўйи юраги ўртаниб юрди. Аёл билиб - билмай унинг оғриқ нуқтаси , яраси битмаган юрагига қайта ҳанжар санчиб, азоб қўйгандек эди. Камрон уйга қайтганида кўнгли ҳамон ҳижил , кайфияти шунга монанд ҳаминқадар эди. Таҳмина ўзини ясаниб - тусаниб кутиб олганини кўрган Камроннинг кайфияти бадтар бузилди. "Таҳмина битта уйни , битта рўзғорни гулдек яшнатадиган жувон,- деб ўйлади Камрон ювиниб олиш учун ваннахонага кирар экан,- у бўлса менинг айбим билан гул умрини менинг остонамда совуриб ўтирибди. Эҳ... Ҳали бу аёл учун қиёматда қанча жавоб берар эканман..." Тахмина бу сафар дастурхонни меҳмонхонага тузабди. Камрон унинг таклифи билан ичкарига кирди- ю , башанг дастурхонни кўриб ҳайрон қолди. - Тинчликми ? - деди у ўзини ҳотиржам тутишга уриниб , - бугун бирон байрамми ? Бугун ҳамма нарса ўзгача- я сен ҳам , мана бу дастурхон ҳам... - Нима фақат байрам бўлса ўзгариш керакми ? - жилмайди Таҳмина,- мен бугун шунчаки бир ўзгариш қилгим келди-да,- у шундай деб охирги сўзларини бошқача эҳтирос билан қўшиб қўйди ,- сиз учун... - Ҳааа ... - деди Камрон оғир- босиқлигини йўқотмай ,- қани ичишга бирон нарса қуй. Жудаям чанқаб кетибман. - Хўп бўлади,- деди Тахмина ва баланд бўйли бокални тўлдириб олма шарбати қўйиб Камронга тутди ,- мана, ош бўлсин. Ортидан бу салатни тавсия қиламан. Мазасига гап йўқ. Камрон шарбатни ярмигача ичиб салатдан ейишга тутинди : - Ҳақиқатда мазали экан,- деди у Тахминага қисқача назар ташлаб ,- кунни мароқли ўтказибсан шекилли ... - Албатта ,- Тахмина кўзларини Камронга тикиб унинг қўлини устидан кафти билан аста сийпалади ,- сабаби буларнинг бари ... Шу вақт стол четида турган Камроннинг телефони мазҳун куй таратиб жиринглади . - Узр,- Камрон Тахминанинг кафтидан қўлини аста суғуриб олар экан телефонни олди ва экранга қаради . Экранда "Ўзимнинг Фотимам" номли исм нур таратганча ўчиб - ёнар эди... давоми_бор /52 #ТОКИХАЁТ