Молитва мученику Трифону звучит так:

"О святый мучениче Христов Трифоне, скорый помощниче всем к тебе прибегающим, и молящимся пред святым твоим образом скоропослушный предстателю! Услыши ныне и на всякий час моление мое, почитающую святую память твою, и предстательствуй о мне пред Господем на всяком месте. Ты бо, угодниче Христов, святый мучениче и чудотворче Трифоне, в великих чудесех возсиявый, прежде исхода твоего от жития сего тленнаго молился еси за ны ко Господу и испросил еси у Него дар сей: аще кто в коей-либо нужде, беде, печали и болезни душевней или телесней призывати начнет святое имя твое, той избавлен будет от всякаго прилога злаго. И якоже ты некогда дщерь цареву, во граде Риме от диавола мучиму, исцелил еси, сице и мя от лютых его козней сохрани во вся дни жития моего, наипаче же в день последняго моего издыхания предстательствуй о мне. Буди мне тогда помощник, и скорый прогонитель лукавых духов, и к Царствию Небесному предводитель, идеже ты ныне предстоиши с лики святых у престола Божия. Моли Господа, да сподобит и мя причастники быти присносущнаго веселия и радости, да с тобою купно удостоимся славити Отца и Сына и Святаго Утешителя Духа во веки веков. Аминь."