ИЛТИЖО

Эй Роббим, сен бизнинг кўзларимизни кўп нарсага очдинг, кўп нарсаларнинг асл қадрини кўрсатдинг:
- Тўйлар 200-250 меҳмон билан ўтсин, дейилганида кўнишга қийналган халқ, 10 киши билан ҳам тўй ўтказса бўлишини билиб етдик ва шунга кўнаяпмиз ҳам.
- Ифторлар ҳам тўкин-сочин, гоҳи уволга чегарадош базм-меҳмондорчиликларсиз ўтиши мумкинлигини ҳам тушуниб етдик.
- Вақтим йўқ, ишим кўп, деб ота-онамиз, уйдагиларни, бола чақани деярли кўрмай юрардик, ана уларнинг дийдорига ҳам бизни етказаяпсан.
- ҳашаматли офислар ҳам увол экан, шу ишларни уйда ўтириб ҳам қилар экан, киши.
- Кўнгил очар масканлар, ресторану кафелар, кинотеатр ва концертларсиз ҳам ҳаёт ўтар экан.
- дунёнинг энг машҳур курортлари эмас, Чорбоғдаги дала ҳовлига чиқиб, дам олиш орзусида ҳам юриш мумкин экан.
- дунё сўрасак, унинг бошқа неъматлари бир чеккада колиб, Сендан эндиликда фақат ўзимизга ва яқинларимизга саломатлик, янги бу дарддан нажот ва эминлик тилайдиган бўлиб қолдик.
- ўтган кунларимизга назар солсак, ўзимизни худди энди ғафлатдан уйғонганлардек, ҳис этмоқдамиз: шунча неъматларинг ва мўъжизаларингни биз табиий бир ҳол ва ўз-ўзидан мавжуд бир матаҳ, деб билар эканмиз.
Бизга кўрсатаётган шу кунларинг ҳикмат ва сабоқларга тўлиб тошган...
Ҳаммасига кўнаяпмиз, ҳаммаси учун шукур...
Фақат Сендан биргина нарса сўрамоқчиман, холос.
Ҳар Жума дўстлардан табрик олсам, қалбим тирналади.
Тунов куни тушимда Жума намозига шошилаётган эканман, лекин ҳеч улгира олмаётган эканман. Югурсам, оёқларим оғир, ҳеч тезлаша олмадим. Масжидга кириб келсам, у макон бўм бўш экан, гўёки жамоа намозини ўқиб, тарқаб кетган эмиш. Масжидингда бирон кимса йўқ... Уйғонсам, кўзларим нам, қалбимда алам.
Сендан шуни илтижо қиламан, эй Қодир Аллох, бизга Жума кунингнинг фазилати, баракоти, раҳмати, ибодати бўлмиш Жума намозимизни қайтариб бергин! Ҳаммасидан уни соғиндик.
© Зафар Комил