Атырдьах ыйын 23 күнүгэр Ньурба оройуонун Хорула нэһилиэгэр биир үөрүүлээх дьоро күн тосхойдо.

Степанида Степановна уонна Тимофей Данилович 60 сыллаах "Бриллиантовай " сыбаайбаларын дьоро тэрээһинэ буолан ааста.
Степанидалаах Тимофей 1965 сыллаахха таптаһар сүрэхтэрин холбоон дьоһун-мааны ыал буолан, алаһа дьиэ тэринэн, икки кыыс оҕону төрөтөн, бочуоттаах сынньалаҥҥа тахсыахтарыгар дылы тыа хаһаайыстыбатыгар үлэлээн-хамсаан олорбуттара.
Нэһилиэкпит ытык ыала "Кыһыл көмүс сыбаайбалаахтар" бочуот кинигэтигэр киирэллэрин чиэстээһинэ ыытылынна. "Хорула нэһилиэгин" ТСТ сүрүннүүр специалиһа Наталья Румянцева юбилярдарбытыгар Саха Өрөспүүбүлүкэтин Ил Дархана Айсен Сергеевич Николаев анал "Дьиэ кэргэн килбиэнэ" бэлиэтин уонна ону туоһулуур сибидиэтилистибэтин туттарда. Ону тэҥэ Ньурба оройуонун баһылыгын Иннокентьев Алексей Михайлович эҕэрдэ суругун уонна Хорула нэһилиэгин баһылыгын Иванов Тимофей Алексеевич ааттарыттан "Кэскил" култуура дириэктэрэ, Хорула нэһилиэгин сэбиэтин депутата Федоров Сергей Иванович эҕэрдэ сурук, сэмэй бэлэх туттартаата.
Бу күн кинилэр бар дьоннорун ортотугар тапталларын өссө бигэргэтэн кыһыл көмүс көлөөскөлөрүн кэтэн, сэмэйдик уураһан бу киэһэни киэргэттилэр. Хорулабыт нэһилиэгин биир бастыҥ дьиэ кэргэнигэр сүүс-сүүстэриттэн өйөнсөн, кырдьыыга бэриммэккэ күндү сиэннэргит мичээрдэригэр, о5олоргут тапталларыгар угуттанан өссө да уһуннук- дьоллоохтук олороллоругар, кытаанах доруобуйаланалларыгар итии-истиҥ эҕэрдэлэр, баҕа санаалар этилиннилэр.
@sakhazags