САЙГЪЫЛЫ ЮРТДАШЛАРЫМ!

Ара-сыра «Къырым Эли» ве «Страна Крым» саифелеримнинъ окъуйыджыларындан меним саде ишиме къол туткъан мектюплер келе. Базы аркъадашларымыз исе: «Лейханъызнынъ инкишафына насыл ярдым эте билемиз?..» деп сорайлар.
Меним саде ишиме дикъкъат айыргъанынъыз ичюн эпинъизге тешеккюрлеримни бильдирем.
Эльбетте, къырымтатар аталар сёзлеринде айтылгъаны киби: «Бир къолнынъ давушы чыкъмаз», «Бирлешкен бинъни йыкъар», «Бирлешкен озар, бирлешмеген — тозар», «Халкъ уфюрсе — боран къопар».
Шубесиз ки, джемаатнен, миллетнен берабер япылгъан ишни даа да къат-къат арттырмакъ мумкюн олур.
Мен беллесем, лейхагъа ярдым этмеге истеген эр бир киши ильк эвеля ашагъыдаки арекетлерни япып олур:
- Саифеде дердж олунгъан хаберлер, макъалелер тюбюнде «бегендим» яни «лайк», «класс» ишарети къоюлса ве ич олмагъанда бирээки сёзден ибарет олгъан изаах (комментарий) язылса, оларны даа да зияде юртдашларымыз корер ве окъур.
- Хаберлер ве макъалелерни озюнъизнинъ ве якъынларынъызнынъ саифелеринде пайлашынъыз.
Бойле этип, биз «Къырым Эли – Страна Крым» лейхасына энъ кениш даирелернинъ дикъкъатыны ве ярдымыны джельп эте билирмиз. Энъ муими – бутюн буларны даимий суретте ве исрарнен япмакътыр.
Сайгъы ве селямларнен,
Айдер ЭМИРОВ .