Ёзда ваъда берганлар,
Газ конини қурганлар,
Не берай? - деб турганлар,
Ўғил-қизга газ беринг!
Баланд учган мўътабар,
Дардимиздан бехабар,
Азроил топмай хабар,
Сизлар бизга газ беринг!
Совуқ қиш темир тузоқ,
Туни узундан-узоқ,
Кулмасин қирғиз-қозоқ,
Ҳаммамизга газ беринг!
Ҳар мушук мовга қийин,
Келин-куёвга қийин,
Ҳаттоки довга қийин,
Қиш тунида газ беринг!
Ишингиз бўлиб чала,
Ваъда бергансиз яна,
Қиш ҳам келди-ку, мана,
Тезда бизга газ беринг!
Совуқда қотди болам,
Шамоллаб ётди болам,
Менга тош отди болам,
Сиз боламга газ беринг!
Меҳрни сочиш керак,
Ёмондан қочиш керак,
Кранни очиш керак,
Қиш кунида газ беринг!
Ваъда бердингиз хўп, хўп,
Сиздан умид эди кўп,
Кўзларга суқмасдан чўп,
Сизлар бизга газ беринг!
Таппи тезда бўлар кул,
Тунда ғусл ҳам мушкул,
Сўрамаймиз сиздан пул,
Фақат бизга газ беринг!
Деманг замоннинг зайли,
Қиммат бўлса ҳам майли,
Ўлмай совуқ туфайли,
Уйимизга газ беринг!
Дилда қолмасин армон,
Бўлайлик сизга дармон,
Қийналиб кетдик ёмон,
Барчамизга газ беринг!
Кимгадир дунё керак,
Кимгадир зиё керак,
Сизларга дуо керак,
Тезда бизга газ беринг!
Болага китоб беринг,
Шоирга хитоб беринг,
Тулпорга шитоб беринг,
Фақат бизга газ беринг!
Присоединяйтесь к ОК, чтобы подписаться на группу и комментировать публикации.
Комментарии 271