11 июлдә Баймаҡ районы башҡорттары ҡоролтайы ағзалары эш сәфәре менән Ырымбур ҡалаһында булды.

Был сәфәр Бөтә донъя башҡорттары ҡоролтайының эш планына ярашлы, сит өлкәләрҙә йәшәүсе милләттәштәребеҙ менән бәйләнеште нығытыу, улар менән хеҙмәттәшлек итеү маҡсатында ойошторолдо.
Беҙҙе Ырымбур ҡалаһы башҡорттары ҡоролтайы рәйесе Марат Самат улы Сарбаев етәкселегендәге делегация йыр-моң менән ҡаршы алды. Тәүҙә Ырымбурҙың үҙәгендә урынлашҡан этно-ауылдар комплексындағы Башҡорт тарихы һәм мәҙәниәте музейында булдыҡ. Музей менән танышҡас, ошонда уҡ “түңәрәк өҫтәл” артында эшлекле һөйләшеү булды.
Ырымбурҙағы коллегаларыбыҙ үҙҙәренең эшмәкәрлеге, музейҙың тарихы, үҙҙәрен борсоған һорауҙар менән сығыш яһаны. Артабан һүҙ баймаҡтарға бирелде. Баймаҡ районы башҡорттары ҡоролтайының башҡарма комитеты рәйесе Азамат Мөхәмәтшин район ҡоролтайы ағзалары менән таныштырҙы, ойошма алып барған эштәр, проекттар тураһында һөйләне. Темәс тарих һәм тыуған яҡты өйрәнеү музейы директоры, тарихсы-реконструктор Айҙар Мәжитов бөрйән ырыуы тарихы, халҡыбыҙҙың данлыҡлы шәхесе Алдар батырҙың тормош һәм яу юлы тураһында сығыш яһаны. Район “Ағинәйҙәр” ойошмаһы рәйесе Гүзәл Монасипова үҫеп килгән быуынды илһөйәр һәм телһөйәр итеп тәрбиәләүҙә ағинәйҙәрҙең роле, ағинәйҙәр алып барған эштәр тураһында һөйләп, үҙ тәжрибәләре менән уртаҡлашты.
Ғ.Сөләймәнов исемендәге сәнғәт мәктәбе педагогы, һәүәҫкәр композитор Хәлил Биктимеров ҡурайҙа уйнаны һәм делегация исеменән музейға ҡурай бүләк итте. Дилбәр һәм Хәлил Биктимеровтар башҡарған моңло йыр һәр кемдең күңеленә хуш килде. Хәлил Биктимеров ырымбурҙарға үҙенең китаптарын да бүләк итте.
Ҡаланың 3-сө мәктәбенең башҡорт теле һәм әҙәбиәте уҡытыусыһы Лиза Ниғмәтуллина мәктәптәрҙә, балалар баҡсаларында “Урал батыр” эпосын өйрәнеү, уны яттан һөйләү буйынса район һәм республика кимәлендә үткәрелгән конкурстар тураһында һөйләне. Халҡыбыҙҙың бөйөк ҡомартҡыһы, ата-бабаларыбыҙҙың быуындан-быуынға тапшырған бай хазинаһы – “Урал батыр” эпосын Ырымбур өлкәһе Ҡыҙыл Гвардия районы Үрге Ильяс ауылында тыуып үҫкән сәсән, фольклорсы, драматург Мөхәмәтша Буранғоловтың районыбыҙҙың 2-се Этҡол ауылында мәшһүр сәсәндәр Ғәбит Арғынбаев һәм Хәмит Әлмөхәмәтовтан яҙып алыуы баймаҡтар һәм ырымбурҙарҙы тағы ла яҡынайта. Быйыл билдәле педагог, яҙыусы, сәсән Азамат Тажетдинов исемендәге конкурстың йомғаҡлау сараһы сентябрҙә эпос яҙып алынған урында ойоштороласаҡ. Телһөйәрҙәр һәм илһөйәрҙәр байрамына ырымбурҙағы милләттәштәребеҙҙе лә саҡырып ҡайттыҡ. Улар беҙҙең саҡырыуҙы ҡыуанып ҡабул итте. Әйткәндәй, республика Башлығы Радий Хәбировтың указы менән быйылдан 8 июндә “Урал батыр” эпосы көнө билдәләнә башланы.
Артабан Республика Халыҡтар дуҫлығы йортоноң Ырымбурҙағы филиалында, Ырымбур ҡалаһының иң ҡиммәтле архитектура ҡомартҡыларының береһе, халҡыбыҙҙың баш йорто тип инселәп төҙөлгән Каруанһарайҙа, уның янындағы “Ат һарайы” музейында, ҡаланың иҫтәлекле урындарында булдыҡ. Көн дауамында милләттәштәребеҙ менән аралашып, эш тәжрибәләребеҙ менән уртаҡлашып, киләсәккә маҡсаттар ҡуйып ҡайттыҡ.
( Азамат Мухаметшин)