Тушларимда кўраман сени,

Боғларда гул териб юрасан.
Ёки анҳор бўйида мени
Маъюсгина кутиб турасан.
Гоҳо бўлиб тенгсиз бир чаман,
Лолалардан гулхан ёқасан.
Хира кўнглим ёритиб бирдан
Тўлин ойдек кулиб боқасан.
Қушдай учиб тубсиз самога,
Зуҳро бўлиб порлайсан, эркам.
Ва айланиб сирли оламга
Қайларгадир чорлайсан, эркам.
Хаёлимдан кетмайсан нари,
Кўринасан: гўзал ва маъсум.
Гўё чўкиб ҳижрон тоғлари,
Куйлаб олам айлар табассум.
Тушларимда кўраман сени.