Фарзандидан рози Онанинг,
Нигоҳлари порлаб тураркан...
Шодлик деган улкан хонанинг,
Эшиклари чорлаб тураркан...
Фарзандидан рози Онанинг,
Оқар экан бахтдан кўз ёши...
Ҳузур экан хар ўтган они,
Сўнмас экан кўнгил қуёши...
Фарзандидан рози Онанинг,
Сўзларида фақат шукур бор...
Дуосида дилбандин исми,
Тилларидан тушмас зикр бор...
Фарзандидан рози Онанинг,
Сочларига эрта тушмас оқ...
Қувонч келиб кўнгил уйига,
Кирмоқликка бўларкан муштоқ...
Фарзандидан рози Онанинг,
Тополмайсиз аламларини...
Гўё ундан бахтли Она йўқ,,
Қидирсангиз оламларини...
Фарзандидан рози Онанинг,
Ҳаловат бор мунис жонида...
Дори дармон олиб юрмайди,
Фақат райҳон турар ёнида...
Икки дунё саодат учун,
Рози қилинг волидангизни...
Шунча сабру қаноат учун,
Рози қилинг волидангизни...
Зоҳид Зиё...
Присоединяйтесь к ОК, чтобы посмотреть больше фото, видео и найти новых друзей.
Нет комментариев