ЯРАЛДИМ
Ишқ-муҳаббат боғлари аро,
Мунгли қўшиқ бўлиб таралдим,
Бу дунёда танҳо ва танҳо,
Сени севмоқ учун яралдим.
Тонглар сокин шаббода бўлиб,
Юзларингда оҳиста елдим,
Умид,орзу салтанатидан,
Мен ўзингни соғиниб келдим.
Кутдим сени минг йил энтикиб,
Мен висолнинг қирғоқларида,
Сенинг исминг бўлди номоён,
Юрагимнинг титроқларида.
Ортаверди ишқим кун сайин,
Бир илоҳий оташда ёндим,
Наштардайин киприкларингга,
Ёмғир бўлиб томчилаб томдим.
Бир туш бўлиб йўғрилдим сенинг,
Оқшомларинг, тунларингга мен,
Офтоб бўлиб сочилдим токи,
Қувноқ,ёруғ кунларингга мен.
Йўлларимга умрингни тўша,
Кўкламлар лол қолсин аҳдингдан,
Мен умидман,орзуман ўша,
Мен сен кутган ўша бахтингман.
ЎЗИНГ УЧУН ЯШАГИН АЁЛ
Ҳаётнинг ҳар қандай шартига кўндинг,
Айт қачон кўксингга тегибди шамол?!
Бола - чақа дединг, рўзғор, иш дединг,
Бир кун ўзинг учун яшагин Аёл!
Сен- эрнинг айбини ёпгувчи қалқон,
Оила кўркига берарсан сайқал.
Майлига ҳар кунмас, лекин ҳар замон,
Бир кун ўзинг учун яшагин Аёл!
Шаффоф кўзгуларни қўлингга олиб,
Олтин қўғирчоқдек ясангин хушҳол.
Юзингга упа сурт, яхши кийиниб,
Бир кун ўзинг учун яшагин Аёл!
Гоҳида дард бирла тилинса бағринг,
Гўё тўлишмайин қолгандай ҳилол.
Қадрингни бунчалар арзон қилмайин,
Бир кун ўзинг учун яшагин Аёл!
Кунларни ўтказдинг елиб, югуриб,
Қўй энди кўнглингни ёзгин келақол.
Ўзингни авайлаб, ўзингни севиб,
Бир кун ўзинг учун яшагин Аёл!