Қуръон ўқимай қўйса оналар?

Олов ичра ёнар таналар,
Бу не ажиб савдо саналар?!
Оҳ, билмадим, нелар бўлади
Қуръон ўқимай қўйса оналар?
Кўкка учгай зўр асотирлар,
Эртакларда қолган ботирлар...
Туғилмаса керак Бухорийлар,
Қуръон ўқимай қўйса оналар?
Ҳадик ила урмоқда юрак:
Бор эзгулик йўқолса керак...
Сўнгги кунга ишора, дарак –
Қуръон ўқимай қўйса оналар?
Кўнгил оғрир, қалбим эзилар,
Буюк мезон чил-чил бузилар,
Само билан ришта узилар
Қуръон ўқимай қўйса оналар?
Ай ёронлар, алам ютасиз,
Айтинг, яна нима кутасиз?!
Уёғига яшаб нетасиз –
Қуръон ўқимай қўйса оналар?