Гул экмасанг тош ҳам экма биродарим.

Бу дунёда ҳамма мехмон, кўнгли ярим. Бор ҳақиқат, ёлғони йўқ айтганларим. Пешонангда неки бўлса кўрмоғинг бор. Туғилдингми демак бир кун ўлмоғинг бор. Кимдир келиб қозонинга эт солмагай. Ризқи бутун саҳрода ҳам оч қолмагай.Фақат Аллоҳ, ўзгаси ҳеч жон олмагай. Пешонангда неки бўлса кўрмоғинг бор. Гулладингми бир кун хазон, сўлмоғинг бор. Бу дунёнинг бойликлари сароб билсанг. Жаннат сенга бағрин очар савоб қилсанг. Бил нодонсан чин дунёнгни хароб қилсанг. Пешонангда неки бўлса кўрмоғинг бор. Оловмисан, қанча ёнма сўнмоғинг бор. Отанг кетди, онанг кетди қолиб бўлмас. Ҳар кишини кўнглин бирдек олиб бўлмас. Бу дунёга келган мағлуб, ғолиб бўлмас. Пешонангда неки бўлса кўрмоғинг бор. Бешик миндинг, демак тобут минмоғинг бор. Икки эшик ораси бу юриб ўтдинг. Кимдир қаср, кимдир кулба кўриб ўтдинг. Биринг йиғлаб, биринг даврон суриб ўтдинг. Пешонангда неки бўлса кўрмоғинг бор. Тупроқ эдинг, яна тупроқ бўлмоғинг бор.