Հազար երանի եմ տալիս ես հիմա
Մեր լավ ու վատ անցած օրերին,
Սոված ու տկլոր եւ ոտաբոբիկ
Վազվզում էինք մեր սարի լանջին։
Արեւը թեքվում էր, ու մութը ընկնում,
Մայրս քաղցր ձայնով մեզ տուն էր կանչում,
Մի կտոր չոր հաց էր մեզ բաժին տալիս,
Մի անկյունում նստած կրծում էինք, ուտում։
Հազա՜ր երանի , ա՜խ, այդ օրերին,
Երբ մայրս ու հայրս մեզ հետ են եղել։
Հազա՜ր երանի, ա՜խ, այն օրերին,
Երբ հեռու աղբյուրից ջուր էինք կրում,
Մայրս իր ձեռքով լվացք էր անում,
Աղած ցորենից կերակուր եփում,
Իսկ մենք միասին տուն էինք մաքրում,
Տնկած ծառերի տակ բահում էինք, ջրում,
Երբ գիշերները մենք հաց էինք ուզում,
Մայրս ծիծաղով մեզ առակ էր պատմում.
«Գիշերվա կերածը կորած է, բալե՜ս,
Առավոտը երեւի մի բան կանեմ ես»։
Հազար երանի, ա՜խ, այն օրերին,
Որ հայրս ու մայրս մեզ հետ են եղել։
Հազա՜ր երանի, ա՜խ, այն օրերին,
Որ հայրս իմ ձեռքից բռնած դպրոց է տարել,
Դպրոցից հետո էլ նա տուն է բերել,
Կողքիս նստել է, ինձ սովորեցրել,
Որ կարողանամ նպատակիս հասնել։
Երբ հայրս կռվից տուն վերադարձավ,
Չնայած վիրավոր էր երկու ոտքերից,
Կյանքը մեզ համար մի քիչ լավացավ։
Երբ հայրս անտառում փայտ էր կտրատում,
Մենք սահնակներով փայտ ենք տուն բերել,
Վառարանը վառել, տունը տաքացրել,
Թաց գուլպաները մոտը չորացրել։
Հազար երանի, ա՜խ, այն օրերին,
Որ հայրս ու մայրս մեզ հետ են եղել։
Օրերը անցան, մենք էլ մեծացանք,
Հերթով ու կարգով մենք ամուսնացանք,
Տուն կառուցեցինք, երեխեք ունեցանք,
Բայց հորս ու մորս մենք չմոռացանք,
Եվ ամեն տարի մենք տոն օրերին
Քույրերով միասին լավ նվերներով
Հորս ու մորս մոտ ենք գնացել
Եվ ուրախացրել, եւ ուրախացրել։
Հազար երանի, ա՜խ, այն օրերին,
Որ հայրս ու մայրս մեզ հետ են եղել։
Չնայած մեր օրերը շատ դառն են եղել,
Շատ ենք չարչարվել ու շատ ենք տանջվել,
Ես խոնարհվում եմ այդ օրերի առաջ,
Հազար երանի կտայի այդ օրերին,
Որ հայրս ու մայրս մեզ հետ լինեին։
Կյանքը զարգացավ, մարդիկ ունեւոր դարձան,
Խանութները լիքը (վերցրու՝ չեմ ուզում),
Քեֆ էինք անում ու կենաց խմում,
Ափսո՜ս, հայրս ու մայրս մեզ հետ չեն լինում։
Մենք էլ մեր հերթին ծերացել ենք արդեն,
Գիտեմ, մի օր էլ մենք չենք լինելու,
Զավակներս սեղան կգցեն, բաժակ կլցնեն
Ու լուռ մեր հոգու կենացը կխմեն։
Եւվ նույնը կասեն, ինչ մենք ենք ասել.
«Հազար երանի, ա՜խ, այն օրերին,
Որ հայրս ու մայրս մեզ հետ են եղել»։
Присоединяйтесь к ОК, чтобы посмотреть больше фото, видео и найти новых друзей.
Нет комментариев