Тайӧ мича аньыс Югыдтыдор грездысь.

И шуӧны сійӧс Карманова Золия Дмитриевна. Золия Дмитриевна пасйӧ ассьыс 85 арлыд тырӧм. Чужліс и быдмис сійӧ вӧр пиӧ кытшалӧм, Вӧль ю бокӧ пуксьӧм , чери-пӧткаӧн озыр Югыдтыдор грездын. Батьыс война вылӧ усьӧма, кор Золиялы вӧлӧма сӧмын на 8 тӧлысь чужӧмсяньыс. Мамыс мӧдысь верӧс сайӧ петавлӧма да ныла-пиаӧс на чужтывлӧма. Нывсӧ вайигас и ачыс кувсьӧма. Золиялы сэк 10 арӧс на сӧмын вӧлӧма. Ичӧт нывка мам кувсьӧм бӧрын быдмис пӧч дорас. Казьтывлӧ, эг пӧ лека олӧй, ас овмӧснад эг торъя тшыгъявлӧй. Школаын 4-ой классӧдз велӧдчӧма Югыдтыдорын, а сэсся 7-ӧд классӧдз - Помӧсдін школаын. Школа помалӧм бӧрын нэмыс уджалӧма. Сійӧ кадас Югыдтыдорад звероферма вӧлӧма, дона куа кыньясӧс и сьӧд ручьясӧс вӧлӧм видзӧны. А ме пӧ вӧлі сэн кроликъясӧс дӧзьӧрита. Зэв пӧ стрӧга уджалысьяс бӧрсяыд начальствоыд видзӧдӧ. Отчыд, шуӧ, тшук пӧ менӧ эз суд улӧ сетны, бумага лыдпасъясас торксьыштӧмысь. Звероферма бӧрад вӧрпунктын уджалӧма пенсия вылӧ петтӧдз. Керъяс увйӧма да сплав вылын ваӧдз тюрйӧдлӧма. Бӧрынджык сэсся кладовшикалӧма. Верӧскӧд, Леонид Петровичкӧд, чужтісны да быдтісны нель ныла-пиаӧс. Верӧс дас во нин кыдз эновтіс таладор югыдсӧ. Золия Дмитриевна дас во жӧ нин олӧ Помӧсдін сиктын, ныв дорас. Зэв бура видзӧ Светлана нылыс: гӧгӧр дзим да дзурк. Неважӧн мамыслы ныв-пиян карын операция син вылас вӧчисны. Дзик нин синтӧммыліс да ӧні сэсся воддза дорысь бурджыка аддзӧ. А синмыд да пельыд кӧ эм, юрыд на кӧ уджалыштӧ да кокыд новлӧдлыштӧ, мый сэсся и колӧ олӧма мортыдлы- ов да красуйччы бур ныв-пиян дорад! Сиам Золия Дмитриевналы крепыд дзоньвидзалун да кузь нэм! Чолӧмавны юбиляршаӧс волісны Помӧсдін ветеранъяс да Бадьёльйыв ветеранъяс котырӧн веськӧдлысьяс Карманова Нина Ивановна да Уляшева Нина Афанасьевна. Кулӧмдін районса ветеранъяслӧн котырӧн веськӧдлысь Елена Адександровна Сазанович нимсянь висьталісны пӧсь чолӧмалӧм да сетісны именинничалы ичӧтик козин.